Dewleta tirke ya îşxalkere 1ê sibate saete 22:00 de bi hewayêkê hemwextî hêrişê Mexmûr, Şingal û Rojawanî kerd. Di endamê Hezanê Xopawitişê ke hêriş de şehîd bîyî û bi desan kesî birîndar bîyî.

Şarê Kampa Mexmûrî semedê wird şehîdan merasîmêk organîze kerd. Bi hezaran kesê ke verê Dezgehê Keyeyanê Şehîdan de ameyî têhet bi rayraşîyayîşî hêrişê dewleta tirke şermezar kerd. Şaro ke heta verê Ofîsê Neteweyê Yewbîyayeyan rayra şi tîya eşkerayîya çapemenîye daye.

Hemsereka Meclîsê Şarî Fîlîze Budaka ke hêrişî şermezar kerdî vat: ''Mexmûr vîro ganî yo. Dewleta tirke semedê çînkerdişê nê her hetî ra hêriş kena. Wazenê ke keda 27 serran çîn bikerê la şarê Mexmûrî ewro reyna tewirê xo ramojna û hêriş pûç vet.''

Berpirsîyarê Partîya Komînîste ya Mexmûrî Heverê Rêbwarî zî tewrê eşkerayîye bi û hêriş şermezar kerd. Rêbwarî şarê Mexmûrî rê serweşîye waşte. Badê qiseykerdişan Merkezê Huner û Kulturî de semedê şehîdan merasîm ame kerdene. Hemserekê Meclîsê Şarî Yusif Karayî zî sozê girêdayîşê şehîdan newe kerd û vat ê do heta qedînayîşê fazîm û zulmî têkoşîn bikerê. Dima ra wird şehîdî ameyî berdene goristan û ameyî definkerdene.