Emser şayîyanê tewr heybetînan ê Newroze ra yew zî do Wan de bêra kerdene. Amadekarîyê Newroze Wan de dewam kenê. Newroze do verê Kelaya Wanî de 20ê adare de bêra fîrazkerdene. Wekîlê HDPyî yê Wanî Sezaî Temellî, wekîlê herême zî do tewrê şayîye bibê. 

Hetkarê Hemserekanê HDPyî yê Wanî Tuncer Saginçî derheqê amadekarîyanê Newroze yê Wanî de agahîyî dayî ANFyî. 

Saginçî da zanayene ke ê prosesêkê antîdemokratîkî de yê û şar do Newroze de waştişanê xo bîyaro ziwan. Saginçî vat: ''Tirkîya de rojdemê sîyasetî giran o, tecrîd, binpaykerdişê heqanê merdiman û şerî welat teng kerdo. Waştişê bi se hezaran kesan Newroza Wanî de na rewşa tengkerde biqedînê. Newroze de ma babeta tecrîdî ser o vinderê, binpaykerdişê heqanê tepişteyan bîyarê ziwan, vera sansûrê çapemenîye vateyê xo vajê û seba çareserîya meseleya kurdan zemînê demokratîkî biwazê. Na Newroze do Newrozanê bînan ra hîna xurtêr biba.

Ma do Newroza xo fîraz bikerê. Xebatê ma yê seba şayîye dewam kenê, karê teknîkî qedîyayî. Ma kuçe bi kuçe gêrenê û venga şarê xo danê ke tewrê Newroze bibo. Ma do verê Kelaya Wanî de Newroze fîraz bikerê. Ma do mîyanê şarî de, şarê xo reyde bibê.'