Dewa Modemanî ya qezaya Dara Hênî ya Çewlîgî de wendekarê lîseyî Muharrem Almasî (17) xo kişt. Seba ke rayîrî girewte bîyî keyeyê ciwanî yo ke merkezê Çewlîgî de ciwîyeno seba ke cenaza bigêro Şaredarîya Çewlîgî ya AKPyî û qaymeqamîye ra hetkarîye waşte.

Goreyê xebera Gazete Duvarî şaredarîye û qaymeqamîye bi bahaneya 'îmkanê ma çin ê' waştişê keyeyî nêard ca. Naye ser o merdim û dewijanê ciwanî 7 kîlometreyan cenaza paştîya xo de berde û resnaye keye.

Merdimêkê ciwanî yo ke nêwaşt nameyê xo bido da zanayene ciwan Muharrem Almas Pansîyonê Wendekaran ê Lîseyê Yeşîlyurtî de mendêne û roja sêşemeyî ra nata tira xebere nêameyêne girewtene.

Merdimê ciwanî vat: ''Muharrem lîse ra vejîyayo û şîyo dewe. Ma zî nêzanenê çira xo kişto. Rayîrî girewte bîyî coka ma vanê pê rayraşîyayîşî resayo dewe. Dewe Dara Hênî ra 60 kîlometreyan dûrî ya. Muharremî têna embazanê xo rê mesaj şawito û vato 'Ez wazena cayêk de ke tede merdimî çin ê têna bimana.' Coka ma vat şîyo dewe. Pê çeka babîyê xo deweka Pertaxî de keyeyê înan de xo kişto. Dewijêkî ma rê vat ey xo kişto.

Ma Şaredarîya Çewlîgî û Qaymeqamîye ra hetkarîye waşte la înan têna vat ê do biewnê mesele. Ma zî cenaza paştîya xo de berde heta rayîrî. Selahîyetdaran û leşkeran ma rê vat îmkanê înan çin o.''

Hemserekê HDPyî yê Çewlîgî Hasan Soysalî zî vera mesele medyaya dîjîtale de nêrazîbîyayîşê xo mojna û vat: ''Vanê seba ke îmkan çinbi înan helîkopter nêşawito. Mesele meseleya zerrî û nîyetî ya. Ma zanenê ke eke zerrîya înan biwaza Uludag de mîyanê dûyan ra merdiman xelisnenê. La seba cenazaya ciwanê ma helîkopter nêşawenê. Res heqêko qanûnî yo. Şertê se benê wa bibê dewlete mejbur a ke rayîran abikera. Heta qereqolî rayîrî akerde yê la uca ra pey rayîrê dewan girewte yê.''