Şaredarîya Sûrî seba viraştişê vîzyonê xebatanê şaredarîye yê dewrê 2020-2024’î xebatanê xo yê viraştişê Planê Stratejîkî yê Şaredarîya Sûrî dana dewamkerdene. Bi rayîrê Komîsyonê Stratejî, fikrê îdarekaranê beşî û ronişteyanê qeza yenê girewtene, seba tewrbîyayîşê înan kombîyayîşê “eywan û dewan de têhetameyîşî” yenê viraştene. Na çarçewa de yewîyê pakîye yê şaredarîye û xebatkar û îdarekarê îkmalê makîneyan ameyî têhet.

Hemsereke Fîlîz Bûlûttekîne zî tewrê kombîyayîşî bîye, kombîyayîş de meseleyê xebatê yewîyan, problemê ken ê xebatan de vejênê û plansazîyê seba halkerdişê nê probleman ser o ame vindertene. Kombîyayîş de seba halkerdişê probleman muhîmîya viraştişê Planê Stratejîkî ser o zî ame vindertene.

 Kombîyayîş de xebatkar û îdarekaranê yewîyê pakîye derheqê problemanê verê qeyûmî û dimayê qeyûmî de qisey kerd û derheqê planê stratejîkî de fikrê xo ardî ziwan. Hemsereke Bûlûttekîne seba keda înan heme personelanê ke tewrê kombîyayîşî bîyê spas kerd, vat ke aye bawer a personelî do gureyo ke keweno milê înan ser bica bîyarê. Kombîyayîş dimayê vatişê fikir û pêşnîyarîyan bi qiseykerdişê Bûlûttekîne qedîya.