Endamê Komîteya Merkezî ya PKK'yî Cemal Şerîkî   roportajê xo yê ANF’yî de Şorişê Rojawanî, şerê mabênê Modernîteya Demokratîke û Modernîteya Kapîtalîste ya Rojakewtena Mîyanêne û cigêrayîşê seba çareserîye ercnayî.

 Şerîkî vist vîrî Rojakewtena Mîyanêne dergûşa panc hezar serrî ya û esasê bingeyênî yê şaristanîye; sinife, bajar, dewlete na herême de vejîyayê werte. Şerîkî ard ziwan ke krîzê sîstemê şarsitanîye yê panc hezarî serran ê sinife, bajar, dewlete nika Rojakewtena Mîyanêne de dereceya tewr berze de yo û vat, “Hetêk ra no esto, hetê bînî ra zî hêzê Modernîteya Demokratîke estê ke xusûsîyetanê cimatkî tarîxkîyan temsîl kenê.”

 Şerê Rojakewtena Mîyanêne Mabênê Modernîteya Demokratîke û Modernîteya Kapîtalîste de yo

Şerîkî vat ke şerê Rojakewtena Mîyanêne mabênê hêzanê Modernîteya Demokratîke û hêzanê Modernîteya Kapîtalîste de yo û wina dewam kerd: “Xîlafo bingeyên mabênê nînan de yo. Na yewe dewrê nikayî de xo bi hawayêkê cîyayî ramojnena. Xo sey hêzê Modernîteya Demokratîke nimûneyê Rojawanî, yê Kurdistanî ramojnena ke bi hwayêkê cimatkîyî organîze benê, mucadeleyê nê danê. Hezê Modernîteya Kapîtalîste zî seba bieşkê zereyê nê krîzî de hemleyêk bikerê organîzasyonanê hemkaran xo rê virazenê. DYA kena ke her yewê înan sey eyaletêk xo organîze bikero. Na yewe zî cigêrayîşê înan ê seba cira vejîyayîşê krîzî yo.”

‘Çareserîya Tekaneye Şaristanîya Demokratîk a’

Şerîkî dewam de vat, “Ma rayîrê modernîteya şaristanîye sey rayîro tekane yê çareserîye vînenê. Ma vanê ke Şaristanîya Demokratîke zî yena manaya newe ra organîzebîyayîşê Rojakewtena Mîyanêne goreyê rastîya xo ya tarîxî û cimatkîye. Ma nê zî sey Konfederasyonê Şaran o Demokratîk ê Rojakewtena Mîyanêne pênase kenê. Seba Konfederasyonê Şaran o Demokratîk ê Rojakewtena Mîyanêne awan bibo zî ganî her dewlete zereyê xo de bi hawayê sîstemê demokratîkî, xoserî û konfederalî organîze bibo. Na yewe zî bi şaranê zereyê xo û dormeyê xo hîra beno, biname kenê. Teberê na yewe de çareserîyêka bîne mumkun nêya.”

Şerîkî vat ke bi na rastîye ganî Şorişê Rojawanî yo nikayên rind bêro ercnayene û vat, “Şorişê Rojawanî nika agêrayo Şorişê Vakur û Rojakewtena Sûrîye. Ganî nay ewe bêro dîyene. No şoriş halkerdişê problemanê şaranê Rojawanî ra wetêr bîyo şorişê demokratîkbîyayîş û azadîya heme şaranê Sûrîye. No vurayîşêko wesifkî yo, ganî sere de no bêro dîyene. Heta ke no vurayîş nêro dîyene merdimî nêeşkenê Şorişê Rojawanî fam bikerê.”

Şerîkî bale ante serê tespîtê Rayberê Şarê Kurdî Abdullah Ocalanî ke vatêne, ‘dewlete û demokrasî’ û ard vîrî ke Ocalan 20 serrî Sûrîye de mendibi, a game Sûrîye de dewlete estbî, la demokrasî çinbi, hetanê aye yê demokrasîyî xo bi xo organîze kerdibi, Kurdanê Rojawanî problemanê xo bi xo hal kerdêne.

‘Gama ke Rejîmî Bajarî Kerdî Vengî, Tekane Hêzo ke Ûca Organîzekerde bi Kurdî Bî’

Şerîkî vat, “Gama ke Sûrîye de şer dest pêkerd û rejîmî bajarî û merkezê ke destê ê de yê kerdî veng, tekane hêzê ê doran o organîzekerde Kurdî bî. Teberê Kurdan de cimatêko organîzebîyaye yo ke bieşko a vengayîye dekero çinbi. Babeta ‘dewlete û demokrasîyî’ de gama ke dewlete xo bianco a game cimat vejêno werte. Şorişê Rojawanî de na yewe virazîyaye. Şorişê Rojawanî yê 19’ê Temmuze yê serra 2012’î xo serê na rastîye de rona. Cimat organîzekerde bi, labelê hetê leşkerîye ra hêzê ci zêde çinbi.

Qamişlo de gama ke bendê ewilênî yê kontrolî ameyî awankerdene, a game bi çend kaleşnîkofan ameyî ronayene. Hetê leşkerîye ra destekê gerîlayan xeylî zêde bi. Bi vejîyayîşê şerî nê organîzebîyayîşî xo kerd hêzêko leşkerî, bi pîl, xo perwerde kerd û agêra bi hêzêkê pîlî. Înan ê ke Şorişê Rojawanî viraşt destûr nêda talanî. Rejîmî xeylî cayî kerdî veng, destûr nêame dayene ke cayê ke ameyê vengkerdene bêrê talankerdene. Înan nê cayî kerdî mulkê cimatî. Ambargoyêko giran ame ferzkerdene, na yewe bî sebebê xeylî zor û zehmetîyan. Dinya de tu hêzî paştî nêdayêne şorişî. Sîstemê bazarî yo ke heta a game estbi zî yewbînan ra vila bibi. Peydakerdişê şekir, sole, çaye û xeylî xidayanê bînan zaf zehmet bi. Problemê awe estbi. Îmkanê şuxulnayîşê telefon û elektrîkî hema hema vajê qe çinbi.”

‘Herinda Bajaranê Raşîyayeyan de Wareyê Cuye yê Hîna Biasayîşî Yenê Awankerdene’

Şerîkî ard ziwan ke şarê ke herême de yê cuya xo bi xo awan kenê û vat, “Awankerdişî de xo nêsepernenê teberî, xo sepernenê xoîdarekerdişî. Cuya xo bi nê hawayî organîze kenê. Şar herinda awanîyanê raşîyayeyan wareyanê cuye, awanîyanê hîna rindan û biasayîşan awan keno. Înanê ke koç kerdo agêrenê Rojawan. Kadroyanê sîstemê xo perwerde kenê. Şorişî mîyan de averşîyayîşêko winayên ame afernayene. Hetê awankerdişê cimatî ra xeylî aver şi. Cehdê TC’yî û hêzanê globalan ê seba vernîgirewtişê Şorişê Vakur û Rojakewtena Sûrîye yo ke tekane modelê çareserîya yê problemanê Rojakewtena Mîyanêne yo dewam kenê. Na yewe ra pozîsyonê hêrişî de yê, provokasyonan dima yê.”

‘Umîd Rayber Apo yo, Xoverdayîşê Şarî û Gerîla yo, Şorişê Rojawanî yo’

Şerîkî seba persa “Zereyê nê dewrê post-modernî de çîyo ke umîd dano merdiman çi yo?” vat, “Rayber Apo yo. Xoverdayîşê şarê Kurdî yo. Gerîla yo ke rixmê zext û hêrişan de derbeyanê giranan dano hêzanê TC’yê kolonyalîstî ro. Şorişê Rojawanî yo. No tena seba ma umîdêk nêyo, seba merdimîye umîd o. Rayber Apo hemverê rastîya merdimê xerckerdeyî û cimatê xerckerdeyî de bi roşnayî. Rayîro ke hetê ê ra ameyo ramotene de şarî mucadele kenê û benê wayîrê qezencanê konkretan. No seba hemeyê dinya bîyo merkezêkê cezbî. Bîyo umîdê hemeyê dinya. Ma zî zereyê a dinya de dilopêk ê, sey a dilope ma hîna formê xo de, hîna xurt ciwîyenê.”