Endamê Komîteya Merkezî ya PKKyî Cemal Şerîkî bi wesîleya serrgêra Komployê Mîyanneteweyî yê vera Rayberê Şarê Kurdî Abdullah Ocalanî ajansê ma rê qisey kerd.

Şerîkî vat:  ''Gama ke komplo ame kerdene têna sey hêrişê vera Rayber Apoyî ame famkerdene. Bê kurdan her kesî vatenê qey wina yo. Hêzanê mîyanneteweyî vatene qey eke komplo bireso amancê xo ê zî goreyê xo meseleya kurdî çareser kenê. Xora no çareserî qirkerdişê kurdan bi. Şexsê Rayber Apoyî de no ameyêne waştene. Înan waştêne ke PKKyî tesfîye bikerê ke wa verê qirkerdişê kurdan de asteng memano. Reyna seba ke înan Rayber Apo verê serûberkerdişê neweyî yê dinya de sey astengî dîyênî waşt ê bidê kişt. Ewro yeno vînayene ke ê sernêkewtî. 

Komployê mîyanneteweyî hetê Amerîka ra ame plankerdene û hetê Îsraîl û Îngîlîstanî ra ame tesdîqkerdene.  Bado ke ame caardene Yunanîstan zî tewrê ci bi, welatê Ewropa tewrê ci bîyî.  Reyna hêzê xayînî zî tewrê komployî bîyî. Destê nê hezanê ke tewrê komployî bîyî de gonîya kurdan esta. Coka no komplo eynî wextî de hêrişê qirkerdişê kurdan o hempar ê warê mîyanneteweyî yo. Belka çirey warê mîyanneteweyî de hêrişêko wina hempar nêameyo kerdene.

Komplo çend beno xorî hêzê mîyanneteweyî vera Rayber Apoyî dahîna ameyî têhet. Vera PKK û şarê kurdî hêrişî zêdîyayî. Ewro Rojawan de vera nê hêrişan xoverdayîş yeno kerdene.  Reyna Herêmanê Pawitişî yê Medya vera nê hêrişan xoverdayîş esto.  Reyna Vakur û leteyanê bînan ê Kurdîstan de zî vera hêrişanê winayênan xoverdayîş yenokerdene. Xoverdayîşê Kobanê, şorişê Rojawanî cewabo tewr pîl ê vera komployî yo. Ewro dormeyê xoverdayîşê Îmraliyî her ca de têkoşîn yeno kerdene, şarê dinya yenê têhet û pîya têkoşîn kenê. Têkoşîno ke 23 serrî yo vera komployî yeno kerdene ganî bêro xurtkerdene. Eke têkoşîn bêro xurtkerdene Tirkya de verê faşîzmî do bêro girewtene û tecrîd bêro şikitene. Pê xurtkerdişê têkoşînî kurdî eşkenê bibê azad û Tirkîya û Rojhilatê Mîyanênî de verê demokratîkbîyayîşî yeno akerdene.

No têkoşîn wina rehet nêbeno. Bedelê pîlî do bêrê dayene. Wextê komployî de kurdî kewtî kuçeyan û bedenê xo tafînayî. Nê adirî rayîrê têkoşînî ramojna. Dima ra hêrişî pîlî ameyî kerdene.  Qirkerdişê pîlî bîyî. Hêrişî hema zî dewam kenê. Vera nê hêrişan têkoşînê pîlî yê gerîlayan û şarê kurdî zî dewam kenê. Ganî bepirsîyarîye têna gerîlayan ser o memano, her ca de têkoşîn bêro xurtkerdene. Reyna hêzê demokratîk sosyalîstî zî ganî berpirsîyarîya xo bîyarê ca. Eke ma wazîfeyanê yê têkoşînî bîyarê ca ma berpirsîyarîya xo ya vera Rayber Apoyî anê ca. Serrgêra komployê mîyanneteweyî de ez reyna Rayber Apoyî, têkoşînê ci yê tarîxî yê Îmraliyî selam kena û şehîdanê ma yê ke rayîrê ma roşn kenê bi hurmet yad kena.''