Bînşewe dewleta tirke bi hewayêkê hemwextî hêrişî Şingal, Mexmûr û Rojawanî kerd. Îdareyê Xoserî yê Şingalî nûtaya Haşdî Şabî ya ke bîye hedefê hêrişan eşkerayîye daye.

Eşkerayîye de hêriş sey dewamê fermanê 2014î ame name kerdene û nê ameyî vatene: ''Îradayê êzidîyan teyara, tanq û topanî ra hêzdar o. Ma soz da şehîdanê xo û ma do tim rêçê înan de bê. 20ê çeleyî de fermandarê ma ameyî hedefgirewtene. Hêrişê vera fermandarê ma û Hesekê hetê eynî zîhnîyetî ra ame kerdene.Dewleta tirke ya îşxalkere û bitaybetî Erdogan paştî danê nê zîhnîyetê faşîstî. Wazenê ke her ca de bêîstîrarîye vila bikerê.  Ma do vera hêrişan rêçê şehîdanê xo de têkoşîn bikerê û do çirey peyser game meerzê. Plan û waştişê dewleta tirke û DAÎŞî yew ê. Bitaybetî hêrişê vizêrî hêrsê Erdoganî yê vera binkewtişê DAÎŞî îfade keno. Binkewtişê DAÎŞî qebul nêkenê. Coka hêrişê Mexmûr, Dêrik û Şehba kenê.''