Şingal de serkêşîya Îdareyê Xoserî yê Şingalî û Têgêrayîşê Azadîye yê Cinîyan ê Êzidîyan TAJÊ de vera îşxalê dewleta tirke yê vera Başûrê Kurdîstanî û îxanetê PDKyî bi sloganê ''vera îşxal û îxanetî wextê têkoşînî yo''  rayraşîyayîş ame kerdene.

Rayraşîyayîşo ke Qilê Serdeştî ra heta Şehîdgehê Şehîd Dilgeş-Şehîd Berxwedanî dewam kerd, temsîlkarê pêro dezgeh û sazgehanê Şingalî, cinî, ciwan û rîsipîyê komelê êzidîyan tewrê ci bîyî. Bado ke qirse resa şehîdgehî Vervatoxê Îdareyê Xoserî yê Şingalî Riham Hasanî eşkereyîye daye.

Riham Hasanî vat: ''Dewleta tirke ya îşxalkere bi hemkarîya PDK û Iraqî 22ê hezîrane ra nata Başûrê Kurdîstanî rê sewqîyatê leşkerî kena ke waranê gerîlayan bigêro binê kontrolî. Dewleta tirke ya îşxalkere wazena Împaratorîya Osmanî ganî bikero, Kurdîstan, Iraq û Sûrîye de hîra bibo. Kena ke bi hemkarîya PDK û Iraqî nê xeyalê xo bîyaro ca la bi serran o gerîlayê HPG û YJA Starî verê înan genê. Têna gerîlayî sey hêzêk vera îşxal û faşîzmê tirkan ê. Dewleta tirke seba ke xeyalanê xo bîyaro ca, bi çekanê qedexeyan hêrişê gerîlayan kena û sûcê şerî kena.

PDK tarîxî ra tim verê azadîya Kurdîstanî û têkoşînê şaran de beno asteng. Semedê kurdan û  komelê êzidîyan hinî îtîbarê PDKyî nêmendo. PDK tim hemkarîya dişmenî keno û ey herra xo de ca keno.  PDK her rojê îxanetê xo girdêr keno. Verê îşxalkeran akeno, ci rê rayîr virazeno. Eke Iraq nê demê tarîxîyî de kayanê dewleta tirke ya bixapîyo, do bikewo yew rayîrî ke agêrayîşê ci çîn o. Dewleta tirke afirnayoxê DAÎŞî ya, inkey DAÎŞî reyna vejena sehne.

Gerîlayê Azadîye vera hemkarîya PDKyî û îşxalê dewleta tirke şerê zehmetî kenê. Ma vanê ke; gerîlayê pawitoxê Kurdîstan û Êzîdxan ê. Înan ma fermanî ra pawit û inkey zî xo ma rê kenê sîper. Ma sey komelê êzidîyan heta peynî paştî danê têkoşînê înan ê bianorî û ma têkoşînê înan ê vera îşxalî selam kenê. Ma do gerîlayê ke têkoşînê vera îşxalî de şehîd bîyî, çirey xo vîra mekerê û ma do bi heme hêzê xo vera îxanetî têkoşîn bikerê.''