Komîteya Amadekarîye ya Newroze ya Şirnexî dest pê şayîyanê Newroze kerd. Şirnex de komîte serê bînaya HDPyî de adirê Newroze vist ta û eşkerayîye daye. Wekîlê HDPyî yê Şirnexî Nurane Îmîr û Hasan Ozguneş û îdarekarê HDPyî yê Şirnexî tewrê eşkerayîye bîyî.

Hemserekê HDPyî yê Şirnexî Sebahattîn Denîzî eşkerayîye wende. Denîzî ard ziwan ke ê adirê Newroze bi xurtî visnenê ta çunke adirê Newroze mujdeyê roşnîya ameyoxî yo. Denîzî vat: ''21ê Adare serrgêra Newroza 1992î ya ke a roje çekdaranê dewlete hêrişê ma kerd û 54 kesî qetik kerdî. Ma nê merdimanê xo bi rêzdarî yad kenê.''

Denîzî da zanayene ke 19ê adare de roja şemeyî ê taxa Behçelîevlerî de Newroze fîraz bikerê û venga pêro kesan da ke tewrê şayîye bibê.

Wekîla HDPyî ya Êlihî Ayşe Acar Başaran, hunermendî Şiyar Berwarî, Kadîr Çat û Koma Hîvron zî do tewrê şayîya 19ê Adare bibê.

Eşkerayîye ra dima bi sloganê 'Newroze fîraz biba' adirê Newroze ame tavistene û girseyî govende girewte.