Dewleta tirke herêma Botanî de serra 1984î ra dima xeylêk sivîlî û gerîlayî qetil kerdî û bi hawayêkê komkî cenazayê nînan binerd kerdî û cenazayê tay kesan zî eştbî çopan ser. Newala Qesaba zî nê cayan ra yew a ke tede bi seyan cenazayî est ê. Newala Qesaba de yê Mahsûm Korkmaz (Egîd) û Mehmet Oktayî zî tede tewr tay cenazayê 300 kurdan est ê. Reyna armenî û keldanîyê ke hetê dewleta ra ameybî qirkerdene, cenazayê înan zî Newala Qesaba de ameybî binerdkerdene. 

Newala Qesaba qasê 405 donim a û mabênê taxa Yenî û taxa Kooperatîfî ya Sêrtî de ya.

Suîkastî ra dima çew nêzdîyê ci nêbi

Weçînayîşanê 1991î ra verî suîkastêk ame kerdene ke sey qesasê PKKyî ame qebulkerdene. Mahmut Çalapkuluyo ANAPgîro ke wexto cenazayî Newala Qesaba de ameyêne binerdkerdene, bibi şaredar keyeyê xo de kişîya. Nê suîkastî ra dima çewî nêwaşt ke Newala Qesaba de îmar bikero.

Awil rayîr virazîya, dima zî akademîya polîsan

Dewlete seba awanîyan hêverî Newala Qesaba de rayîr viraşt, dima zî tede Akademîya Polîsan ameye akerdene. La dewlete seba viraştişê bînayan-awanîyan mutahîdêk nêdî. Dima ke 2015 de AKPyî vera kurdan şer îlan kerd mutahîdê 'eslê xo de kurd ê' ameyî erkdarkerdene. Abdulkerîm Dayan û Nîyazî Yilmaz bi şîrketa xo ya 'War' dest pê viraştişê vîlla, bînayan û binawanîye kerd.

Abdulkerîm Dayan kam o?

Wexto ke Şaredarîya Sêrtî ra qeyûm ame tayînkerdene Andulkerîm Dayan zî bi endamê AKPyî. Mutahîd Dayanî hêverî dewa Bîlgî ya qezaya Dihî de awbend viraşt. Dima ey dewlete ra zaf îhaleyî girewtî. Wexto ke Erdogan û wezîrî şîyêne Sêrtî mesrafê werdî Dayanî dayêne. Coka îhaleya karanê pakîye yê Şaredarîye zî dîyaye ey. Dayanî Suleyman Soylu, Mudirê Asayîşî yê verênî Nîhat Ozen û Mudirê Weqfa yê verênî Saît Sancarî reyde zî bazirganîye kerdêne. Sancarî erazîya Newala Qesaba sey dîyarîye daye Dayanî. 

Qata qeçaxe de kêf û şayîye

Abdulkerîm Dayanî rixmê goreyê îmarî nêbi zî serê rayîrê Dihî de benzînxaneyêk akerd û dima benzînxane de bi destûrê qeyûmî qata qaçaxe awan kerde. Tîya de burokratê dewlete, selahîyetdarê MÎTî û îdarekarê AKPyî kêf û şayîye kenê. 

Dewlete ey pawena

Abdulkerîm Dayanî tewr peyên cayo ke aîdê bi seyan esnafan bîyo, bi zorî girewt û xalî kerd. Dayan tersê şarî ra pê pawitoxanê xo yê polîsan gêreno. Dayan pê wesayîtanê zirxînan pawîyeno.