Serkêşîya Kongreya Komelê Demokratîke (KCD), Kongreya Demokratîke ya Şaran (HDK), Têgêrayîşê Cinîyan ê Azadan (TJA) , Partîya Herêman ê Demokratîkan (DBP), Partîya Demokratîke ya Şaran (HDP) û Îtîfaqê Kurdîstanî de adiro verên ê Newroza 2022î qezaya Elkê ya Şirnexî de bi şîarê 'Wext wextê serkewtişî yo' ame tafînayene.

Hemserekê KCDyî Berdan Ozturk, Hemserekê DBPyî Salîha Aydenîz û Keskîn Bayindir, Verbatoxa HDPyî Ebruye Gunay û wekîlê HDPyî û xeylêk merdimî tewrê şayîye bîyî. Girseyî verî bi sloganê 'Biciwîyo Newroze' raşraşîyayîşêk kerd, dima zî warê şayîye de deyîrî vatî.

Ebruye Gunay şayîye de qisey kerd, Newroza her kesî fîraz kerde û vat: ''Newroze wextê serkewtişî yo. Ma bi ruhê xoverdayîşî Newroze pêşwazî kenê. Şarê kurdî yewîye, azadîye û haştîye wazeno. Îqtîdarê AKP-MHPyî dişmenîya vera kurdan ra faşîzmî pîl keno, muxalefet zî ma înkar keno. Ma do rayîrê hîrêyînî bivisnê dewre, bedelê ci se beno wa bibo azadîye, demokrasî û haştîye bîyarê nê erdî. Meseleya kurdan pê înkarî çareser nêbena. Adresê çareserîye Birêz Ocalan o. Wa her kes goş bido vateyanê Ocalanî. Çareserîye Ocalan û têkoşîno hempar ê şaran o.''

Hemsereka DBPyî Salîha Aydenîz vat: ''Şarê Botanî bedelêko pîl da. Adiro ke ewro tîya de vêşeno, do faşîzm, tarîtî û qedexeyan bivurnê roşnîye. No adir do azadîye û haştîye bîyaro. Roje roja yewî ya, ma ewro seba yewîye nê adirî tavisnenê. Ma bi xoverdayîşê şarê Botanî adirê azadîye visnenê ta.''

Hemserekê KCDyî Berdan Ozturkî vat: ''Şarê Botanî sey her wextî serkêşîya xoverdayîşî keno. Xêrê xoverdayîşê Birêz Ocalanî ra ma resayê nê rojan. O 24 serrî yo xoverdayîşêkê pîlî keno. Seba azadîya ma, seba şaranê Rojhelatê Mîyanênî û haştîyêka rûmetêne xo ver dano. Seba ma wext wextê serkewtişî û wextê azadkerdişê Ocalanî yo. Şarê ma do waranê Newrozan de mesajêkê pîlî bido îqtîdarî.''

Qiseykerdişan ra dima Mayanê Haştîye adirê Newroze vist ta. Bi seyan kesan dormeyê adirî de govende girewte.