Serrgêra 100ine ya Serewedaritişê Şêx Seîdî de 27-28ê hezîrane de şaristanê Brukselî yê Belçîka de konferansêk, 29ê hezîrane de şaristanê Kolnî yê Almanya de rayraşîyayîşêk û mîtîngêk do bêrê kerdene.

Hemserekê KNKyî Ahmed Karamusî derheqê babete de ajansê ma rê qisey kerd.

Karamusî îfade kerd ke serewedaritişê sey ê Şêx Seîdî seba azadîya kurdan ameyê kerdene coka ganî kurdî nînan hol fam bikerê. Karamusî da zanayene ke ê wazenê nîqaş bikerê verî û dimayê Serewedaritişê Şêx Seîdî se bîyo.

Karamusî dîyar kerd ke Peymana Lozanî reyde neheqîyêka girane kurdan rê ameya kerdene, Serewedaritişê Şêx Seîdî vera ney ameyo kerdene û waştişê Şêx Seîdî û embazanê ey ewro zî derbazdar ê.

Karamusî bale ante ser ke kurdî hema zî çareserîye de israr kenê û vat: ‘’Konferansê Brukselî waştişê têrîbîyayîşî yo. Eke raşta zî haştîye yena waştene ganî kurdan rê neheqîye nêra kerdene. Tayê kesî kenê ke bi qiseyê ‘apeywazîye’ nameyê Şêx Seîdî reş bikerê. Ey seba şerîatî ney seba azadî û heqanê kurdan sere wedaritibi. Konferans de do pêro hetê serewedaritişî bêrê ercnayene.’’

Karamusî seba yewîya neteweyî bale ante girîngîya zemînê hemparî ser û vat: ‘’Konferansê Brukselî seba yewîya kurdan girîng a. Serewedaritişê Şêx Seîdî seba waştişanê demokratîkan û neteweyîyan dîyabi destpêkerdene. Dima zî Dêrsim, Agirî, Koçgirî, Zîlane û Sason de serewedaritişî ameyî kerdene. Yanî kurdan tim seba heqanê xo têkoşîn kerd. Ma zî wazenê ke nê konferansî de bivînê ke ma eşkenê nê ruhî ancî bivisnê destî.’’

Karamusî vist vîrî ke akademîsyenê pisporî, cigêrayoxî û roşnvîrê pisporî do tewrê konferansî bibê.

Karamusî ard ziwan ke konferansî ra dima 29ê hezîrane de Koln de rayraşîyayîş û mîtîngêk do bêrê kerdene. Karamusî venga pêro kurdîstanijan da ke seba wayîrvejîyayîşê erjanê neteweyîyan tewrê rayraşîyayîş û mîtîngê Kolnî bibê.