Fermandara YJA-Starî Ferîde Alkan serrgêra 36. ya Hamleya 15ê Tebaxe de rojnameger Çinar Goktaşî reyde qisey kerd.

Ferîde Alkan hêverî şexsê Fermandarê Hamleya 15ê Tebaxe Egîd û pêro şehîdanê azadîye û ê Cengê Heftanînî bi rêzdarî yad kerdî û vat: ''Cengê Heftanînî rojdemêko girîng aferna. Operasyonê vera Heftanînî ra 2 mengî vîyartî. Embazêka ma ya 19 serre leşkerê dişmenê ke waştêne dekewê Pîrbûla bi xoverdayîşî pêşwazî kerdî. Hêrişê 8 baskan ê embazan de 22 leşkerî kişîyayî û 8ê ci birîndar bîyî. Êyê ke mendî remayî. Şehîda verêne ya nê xoverdayîşî embaze Warşîne bîye. Eke embazan verê dişmenî Heftanîn de nêgirewtene dişmenî do pêro Başûrî îşxal bikerdêne. Bi nê hawayî ma mesaj da artêşa tirke ke a nêeşkena bikewa her ca.

Ma Cengê Heftanînî de bi terzê gerîlatîya moderne têgêrenê. Ma bi taktîkanê xo teknîkê dişmenî çin kenê. No dewirê gerîlatîya modern û profesyonele rayberîya gerîlayanê YJA-Starî de yeno caardene.

Cengê Heftanînî cengê meydanî yo. Ma rayberîya Rayber Apoyî de, xeta têkoşînê çekdarî de şexsê Fermandar Egîdî de xoverdayîşê xo geş kenê. Ma do şar û erdê xo azad bikerê.

Nê menganê peyênan de Cengê Heftanînî de tewr tay 300 leşkerî kişîyayî. Mîyanê leşkeranê dişmenî de zî sendromêk virazîya.

Heftanîn xoverdayîş o. No xoverdayîş vengdayîşa gerîlayan ê seba ciwananê Kurdîstanî, Rojhelatê Mîyanênî û her kesî yo ke wazenê faşîzm, kolonyalîzm û îşxalî ra bixelisê. Vakur û Başûrî ra ciwanî tewrê ma benê. Îqtîdar xîret keno ke pê dişmenîya vera kurdan û şerî xo mende bikero. Cengê Heftanîn veng dano vano ke wurzê payan ser. Ma venga elewîyan, misilmanan, antîkapîtalîst, demokratan û pêro komelî danê ke bibê yew, xo rêxistin bikerê. Ma sere de cinîyan venga ciwanan danê ke vera faşîzmî têbigêrê.

Ma pê bawer ê ke serra têkoşînî ya azadîye ya 37. de ma do bi ruhê Hamleya 15ê Tebaxe cewab bidê dişmenî.

Bi na wesîke ez Roşanê Newerabîyayîşî yê 15ê Tebaxe yê şehîdan û welatperweran fîraz kena.''