Ame îdîakerdene ke artêşa tirke do bi hemkarîya PDKyî 15ê nîsane de vera gerîlayan dest pê hêrişî bikero. Çimeyêkê cayîyî ke zanayîş da ANFyî vat badê provokasyonanê PDKyî artêşa tirke herêma Kanîmasî de do hêrişê îşxalî bido destpêkerdene.
Wextêk o hem medyaya Başûrê Kurdîstanî hem zî çimeyê cayîyî vanê ke artêşa tirke do bi tewrbîyayîşê aktîfî yê PDKyî wexto kilm de hêrişê waranê gerîlayan bikero. Komîteya Tekîlîyanê Teberî ya KCKyî zî vizêr bi eşkerayîyêke vat înan eşnawito ke PDK tay çalakîyanê provokatîfan plan keno.
Çimeyêkê cayîyî yê ke zanayîş da ANFyî vat raşt o, îdarayê PDKyî û dewleta tirke planê hêrişî yo hemkar kerdo. Goreyê zanayîşê ke no çimeyo ke mîyanê PDKyî de dayo; 15ê nîsane de herêma Kanîmasî ya Dîhokî de do vera waranê gerîlayan hêriş bêro destpêkerdene.
Zanayîşê ke nê çimeyî ra ameyî girewtene wina yê: ''Seba ke dewleta tirke semedê hîrê rojan debikewo nê cayan amadekarîye ameya kerdene. Teqayîşêko do bêro kerdene de do hîrê berpirsîyarê payeberzî (leşker) bimerê ke nînan ra yew masaya PKKyî de xebitîyeno, leşkero bînî zî berpirsîyarê hêzanê Zêrevanî yo. Semedê nê provokasyonî hêzê Zêravanî ( yewîyê taybetî yê PDKyî) û pêşmergeyê Rojî zî tede ekîbêkê 15 kesan baregehê Binesalawî de ameyî cakerdene. Ekîbêk serê GPSyî ra eynî cade, ekîbo bîn zî berpirsîyarîya îstîxbaratê tirkî de ameyo ronayene. Ekîbê diyînî bi nameyê Asayîşê Lewenî pê kincanê sîvîlan têgêreno.Yewîya hêrişî yê Zêrevanî hetê Lorkan Mutaho musullujî ra yena îdarekerdene.''
Goreyê planî nê serebûtî do bêrê qewimîyayenê:
1- Peşmergeyê PDKyî do bêrê kiştene.
2- Xeta boru ya ke Başûrê Kurdîstanî ra şina Tirkîya do bêro teqnayene.
3- Warê sîvîlan ê herême de do wesayîtêk bêro teqnayene.
Pê nînan yeno waştene ke hêrişê îşxalî bêrê meşrûkerdene û hêrişkarî heqdar bêrê ramojnayene.
Eynî çimeyî semedê amadekarîya hêrişanê dewleta tirke zî nê vatî:
1-Warê şerî û dormeyê ci do hewayî ra bêro kontrolkerdenene.
2- Semedê hêzanê PDKyî cepilxane û madayê teqnayîşî do bêrê amadekerdene.
3- Paştdayîşê hêzanê erdî do bêro dayene ( sey tank û wesayîtanê zirxinan ê bînan)
4- Ronayîşê odayê şerî yo ke PDK û artêşa tirke do pîya tede ca bigêrê.
Goreyê planî verî seba ke tekîlîya gerîlayan bêro birnayene do rayîrê Kanîmasî bêro qefilnayene û dima ra semedê destfînayîşê heme koyanê Metîna bêro têgêrayene.
