Komîteya Tekîlîyanê Teberî ya KCKyî derheqê plananê îşxalî yê hemparî yê dewleta tirke û û PDKyî de eşekrayîyêka nuştekîye dayî û nê pare kerdî:

''Newroze de Kurdîstan û her hetê dinya de kurdan reyna mojna ke senî pabesteyê Rayber Apoyî yê. Kurdî Newroze de vejîyayî waran û vera faşîzmê AKP-MHPyî mesajê xoverdayîşî dayî. Newroza 2022î têkoşînê kurdan ê 50 serran reyna fîna çimanê dinya ver. Seba ke têkoşîno biheybet ê şarê ma rê tehemul nêkena dewleta tirke qerarê operasyonanê îşxalî yê neweyan û qirkerdişî girewt.

Dewleta tirka ke 1982yî ra nata vera têgêrayîşê ma operasyonanê leşkerîyan kena 2021î de sere de Garê vera heme Başûrê Kurdîstanî operasyonê îşxalî dayî destpêkerdene. Hêzanê ma pê bedelanê pîlan vera nê hêrişan xover da û qismo pîl ê planê înan betal vet. Gerîlayan waranê Garê, Werxelê, Mamreşo, Zendûra û Girê Sorî de pê qehremanîya pîle darbî dayî dişmenî ro. Gama ke gerîlayanê ma semedê pawitişê erdê Başûrê Kurdîstanî ganê xo feda kerdêne, PDKyî paştî dayêne dewleta tirke.  Seba ke PDKyî zanayîş da dewleta tirke û vera waranê gerîlayan  provokasyonî kerdî destûr nêda ke îşxalê dewleta tirke bi temamî bêro binfînayene.

Bi rojano çapemenîya Başûrê Kurdîstanî de yeno munaqeşekerdene ke dewleta tirke û PDKyî semedê hemkarîya operasyonanê îşxalî yê neweyan pê kerdo. Goreyê  nê xeberan hêrişî îşxalî yê dewleta tirke emser bi tewrbîyayîşê PDKyî do bêrê kerdene. Yeno nuştene ke PDK do aktîf tewrê operasyonanê dewleta tirke bibo û pêşmergeyan vera gerîlayan bikero tewrê şerî. Zanayîşê winayênî wextêko ma rê zî yenê. Ma rayapêroyî rê da eşnawitene la rixmê naye çapemenîye de zî yeno vînayene ke PDK vera gerîlayan tewrê hêrişê dewleta tirke beno.

Goreyê zanayîşê ke çapemenîye de yenê munaqeşekerdene û resayê ma seba ke PDK operasyonanê îşxalî de aktîf  ca bîgêro û nê operasyonan bikero meşrû tay çalakîyê provokatîf yenê plankerdene. Goreyê naye; pê xeberanê zûran do şarê kurdî vera gerîlayanê azadîye yê Kurdîstanî bêro dekerdene. Eke nê ra tiway mero destkewtene vera şar û pêşmergeyan do hêrişî bêrê kerdene û bierzîyê milê gerîlayan ser. Xora tay sîteyanê provokatoran ê ke xizmetê PDKyî de yê dest pê karî kerdo. Hetê bînî ra çapemenîye de zî ame vînayene PDKyî hêzê xo yê leşkerî waranê ke 20 serran ê gerîlayan de ca kerdî. No çîyêko zaf tehlukeyo ke têna xizmetê dewleta tirke keno.

 Ma reyna PDKyî hîşyar kenê ke wa nê kayanê leyminan a mexapîyo. Eke cayê hêzanê dewleta tirke de ca bîgêro, vera gerîlayanê Kurdîstanî şer bikero darbeya pîle dano kurdan û heme destkewteyanê Kurdsîtanî ro. Eke PDK pîya bi dewleta tirke hêrişê waranê gerîlayan bikero, no hêrişê vera statu û destkewteyanê Başûrê Kurdîstanî yo zî. PDK ganî mîyanê nê planî mebo ke beno felaketê şar û welatê ma. Ma veng danê  Parlamentoyê Başûrê Kurdîstanî, partîyanê sîyasîyan, rêxistinanê komelê sîvîlî, dezgehanê fermîyan û rayapêroyîye wa vera planê îşxalî vejîyê û PDKyî hîşyar bikerê. Wa heme şarê ma hîsgêr têbigêro ke PDK tewrê nê planê leyminî mebo.''