Amed de 328 dezgeh û rêxistinanê komelê sivîlî bi wesîleya ya 1ê Êlule Roja Haştîye ya Dinya  Deklarasyonê Haştîye, Meydanê Şêx Seîdî de îlan kerd.

Serekê Baroyê Amedî Nahît Erenî eşkerayîye wende. Erenî vist vîrî ke heqê merdiman o ke dinyaya bêşere de biciwîyê û vat: ''La her cayê dinya de pêkewtiş û şerî est ê. Rixmê ney zî ma do vera şerî tim haştîye bipawê. Heyf ke prosesê seba çareserîya meseleya kurdan goreyê waştişanê komelî netîce nêda. Rixmo ke şer û pêkewtişan newe ra dest pêkerd komel hema zî haştîye, çareserîye û muzakerayan wazeno.

Seke rêxistinanê komelê sivîlî û dezgehan tesbît kerdo Tirkîya de sebebê krîzê ekonomîkî û krîzanê bînan çaresernêkerdişê meseleya kurdan o. Ganî polîtîlayanê 'asayîşî' ra fek vera bêro dayene. Tepişîyayîşê bi sebebê govend û deyîranê kurdkî mojneno ke ferasetê çaresernêkerdişî dewam keno.

Ganî haştîye biba babeta tewr girînge. Ma venga pêro dormeyan danê ke seba awankerdişê haştîye, çareserîya meseleya kurdan û qedînayîşê şerî têbigêrê.''