Amed de bi eşkerayîyêke startê Newroze ame dayene ke emser 78 şaristananê Vakurê Kurdîstanî û Tirkîya de do bêra fîrazkerdene.

Kongreya Komelê Demorkatîkî (KCD), Têgêrayîşê Cinîyan ê Azadan (TJA), Partîya Herêmanê Demokratîkan (DBP) û HDP Amed de kom bîyî. Kombîyayîş de deklarasyonê Newroze ame eşkerakerdene.

Hemserekê KCDyî Berdan Ozturk, Hemserekê DBPyî Salîha Aydenîz û Keskîn Bayindir, Hemserekê HDPyî Mîthat Sancar û aktîvîsta TJA Emele Temel tewrê kombîyayîşî bîyî. Partîyanê Îtîfaqê Kurdîstanî ra Serekê Partîya Komunîste ya Kurdîstanî (KKP), PDK-Vakur, Partîya Azadîye, Partîya Azadîye û Merdiman (PÎA) û Komeleya Kurdan a Demokratîke ya Şorişgêre (DDKD) zî tewrê kombîyayîşî bîyî.

Emser Newroze bi şîarê 'Wext wextê serkewtişî yo' 78 şaristananê Vakurê Kurdîstanî û Tirkîya de do bêra fîrazkerdene.

Deklarasyon de verî qala Newroze ameye kerdene dima zî bale ameye antene hêrişanê dewleta tirke yê vera kurdan ser. Deklarasyon de ame parekerdene ke Newroze vîrê kurdan de roja têkoşîn û serkewtişî ya.  

Deklarasyon bi kilmî wina yo:

''Kurdî bîyê Newroze, Newroze bîya şar. Newroze îfadeyê estbîyayîşê şarê kurdan û îradeyê cuya azad û demokratîk a. Ewro bi destê Kawayanê modernana şarê Kurdîstanî aver şino. Newroze hînî vurîyaya qîrayîşê 'Azadîye nasnameyê ma yo' yê kurdan. Bi na hişmendîye ma Newroze rê vanê ma bi xêr dî.

Ma Newroze 2022î nê prosesî de ke faşîzm û kolonyalîzm xîret keno ke ma mîyanê tarîtîye de bifetisnê pêşwazî kenê. Zulm û zorbazîye her ke şinê zêdîyenê, şerê hegemonya Ukraynaya de resayo astêka bîne. Ma venga şaran danê ke vera polîtîkayanê şerî yê dewletan barîkatê haştîye awan bikerê. Çareserîye qedînayîşê şerî yo û ganî Ukrayna biba pirdo bêteref ê haştîye.

Îqtîdarê AKP-MHPyî Rojawan û Başûrê Kurdîstanî de polîtîkayanê îşxalî ano ca, verê çimanê dinya de çekanê kîmyewîyan xebitneno. Ma veng danê ke nê hêrişî cade bêrê qedînayene. Nê hêrişî parçebîyayîşê sîyasetê kurdan ra hêz gênê. Wa pêro partî û hêzê Kurdîstanî tewir û sîyasetanê menfaatanê xo ra fek vera bidê û bi şîarê 'Roje roja yewîya neteweyî ya' destkewteyanê kurdan bipawê. Birêz Ocalan 24 serrî yo Zîndanê Îmraliyî de binê tecrîd û îşkenceyî de yo ke no sûcê merdimîye yo. Wa pêro tepişteyê sîyasî û nêweşî bêrê veradayene. Ma venga hukmatî danê ke sere de Birêz Ocalan seba pêro tepişteyanê nêweşan û sîyasîyan gamêke bierzo.

Rejîmê xespî binê nameyê qeyûmî de polîtîkayanê qirkerdişî yê vera ziwan, nasname û kulturê kurdan ano ca. Kurdkîya ke ziwananê qedîman ra ya, bi destê hukmatê AKP-MHPyî yeno qedexekerdene. Perwerdeyê bi ziwanê dayîke waştişo tewr pîl ê kurdan o û xeta sûre ya kurdan a. Ma dewaya ziwanê kurdkî kenê û heta ke kurdkî biba ziwanê perwerdeyî têkoşînê xo ra fek vera nêdanê.

Şerê AKP-MHPyî yê vera kurdan welat de bîyo sebebê krîzê ekonomîkî. 'Îqtîdar seba ke rijîyayîşê xo binimno û emrê xo derg bikero wazeno HDPyî pê dewayanê komployan biqefilno. Şarê kurdî vera hêrişan xo ver da, hêrişî pûç kerdî û do pûç bikero.

Vera nê hêrişan çareserîye caardişê yewîya neteweyîye ya Kurdîstanî yo. Naye ra pey ma do têkoşînê azadîya neteweya kurdan bigêrê xo ser.

Ma nê prosesê tarîxî reyde Newroza 2022î pêşwazî kenê. Ma do Newroza 2022î sey Newroza azadî û serfîrazîye fîraz bikerê. Ma venga şarê kurdî danê ke dormeyê adirê Newroze de bêro yewca, coş û serewedaritişê xo berz bikero, waştişê azadîye biqîrê û cayêke meverdê, her ca de Newroze fîraz bikerê. Ruhê xoverdayîşî yo ke cinîyan 8ê Adare de vet werte bi ruhê azadîye Newroze de pîl bikerê û ver bi serkewtişî şorê. Ma venga her kesî danê ke vejîyo meydanan û Newroze bi coşî fîraz bikero.

Newroza Azadîye û Serkewtişê Tarîxî yê kurdan, kurdîstanijan û pêro şaran fîraz ba.''