Rêxistina HDPyî ya Amedî vera tepişnayîşê Hemsereka KCDyî û Wekîla HDPyî Leyla Guven bi eşkerayîya çapemenîye nêrazîbîyayîş ramojna.

Eşkerayîya ke verê Vîrdarîya Heqanê Merdiman a Parka Koşuyolu de ameye dayene îdarekarê KCD, HDP, DBP, TJA,, ESP, MEBYA-DERî yê bajarî tewrê ci bîyî.

Wekîlê hemserekanê HDPyî yê Amedî Îrfan Sonerî vat: ''Ma senî ke heta ewro verê zilmê do çok nêda ma do ewro ra tepîya zî çok nêdê. Sere de Leyla Guvene tepişteyê sîyasîyî anorê ma yê, ma do rêça înan de mucadeleyî pîl bikerê.''

Hemserekê KCDyî Berdan Ozturk zî vat: ''Leyla Guvene seba ke sîyaset kerd ameye tepiştene. Wazenê ke vengê ma bibinê. Îqtîdaro faşîst bêçareyîya xo ra hêrişê ma keno. Mucadeleyê ma mucadeleyê merdimîye yo. Mucadeleyê ma semedê azadîya şarê Kurdî û Kurdîstanî yo. Çoka ma do çireyê milê xo çewt nêkerê, çok nêdê.''

Vervatoxa TJA Ayşe Gokkan zî vat: ''TJA do vera dewleta camêrd-dewlete de  milê xo çewt nêkero. TJA qet yew wext zî faşîzm qebul nêkerd. Çirey milê xo çewt nêkerd, do nêkero.''