Platformê Kede û Demokrasî yê Amedî çarçewa Roja Ziwanê Dayîke de eşkerayîya kirdkî daye û waşt ke her şar bi ziwanê xo perwerde bivîno. Platformî venga hukmatî da û vat: ''Meseleya ziwanî pê çend gamanê xapînokan çareser nêbena.''
Platformê Kede û Demokrasî yê Amedî bi wesîleya 21ê Sibate Roja Ziwanê Dayîke û Hewteyê Ziwanê Kurdkî Meydanê Şêx Seîdî de eşkerayîyêke daye.
Torra Ziwanê Dayîke, Komeleya Edebîyatkeranê Kurdan, Komeleya Cigêrayîşanê Ziwan û Kulturî ya Mezopotamya (MED-DER) û Pena Kurdî û Esntîtuyê Kurdkî yê Amedî, Wekîlê HDPyî Remzî Tosun û Îmam Taşçier, aktîvîstê TJA zî tewrê eşkerayîye bîyî.
Eşkerayîya kirdkî hetê Semra Bîrtane Ozdemîr, eşkerayîya kurmanckî zî hetê Fesîh Zîrekî ra ameye wendene.
Semra Bîrtane Ozdemîr îfade kerd ke perwerdeyê bi ziwanê dayîke heqo meşrû yo û astengkerdişê nê heqî zî astengkerdişê heqanê merdiman o. Ozdemîre bale ante ser ke qedexekerdişê ziwanê dayîke tewr zaf tesîrê domanan keno û waşt ke domanî bi ziwanê xo yê dayîke perwerde bivînê.
Ozdemîre vat: ''Ma venga îqtîdarî danê ke wa polîtîkayanê qedexekerdişî û asîmîlasyonî ra fek vera bido. Wa perwerdeyê bi ziwanê dayîke bêro dayene. Bi çend vateyanê xapînokan meseleya ziwanî çareser nêbena. Ma venga pêro kurdan û dezgehanê kurdan danê ke wa wayîrê ziwanê xo vejîyê. Xelisîyayîş qiseykerdiş û şuxilîyayîşê ziwanê kurdkî de yo.''
Hemserekê MED-DERî Rifat Ronîyî eşkerayîye de qisey kerd û pare kerd ke seba netewebîyayîşî şerto yewin şuxilnayîş û perwerdeyê bi ziwanê dayîke yo.
Eşkerayîye ra dima girseyî govende girewte.
