Taxa Xelikanî ya qezaya Çêrmûgî ya Amedî de Selahattîn Ozkahraman û kênaya ci Surîye Ozkahraman wexto ke seba tazîye ameybî dewe pê çekanê giranan kişîyaybî. Ame vatene ke keyeyê Ozkahramanî verî tedayan ra koçê Mersînî kerbi.

Rixmo ke serebûtî ra 9 megî vîyartî vergumanê fîrarî Emre û Engîn Yalçin nêdîyayî. Derheqê Remzî, Hayrettîn, Şeyhmus, Ferît Yalçin û Bîrgul Menteşî de îdîaname pêşkêşê mehkeme ame kerdene.

Goreyê îdîanameyî verguman Hayrettîn Yalçinî wextê weçînayîşê 2019îde tedaya Selahattîn Ozkahramanî kerd ke raye bidê namzetê înan Emre Yalçinî. La S. Ozkahramanî no red kerd. 12ê hezîrane de mabênê keyeyan de pêrodayîş vejîya û keyeyê Ozkahramanî koçê Mersînî kerd. Keyeyê Ozkahramnî wexto ke seba tazîye ame dewe zî teda dewam kerd. Wexto ke keyeyê Ozkahraman şi axpînê xo hetê Emre, Engîn Yalçin, Şeyhmus, Ferît, Remzî, Hayrettîn Yalçinî ra kişîya.

Goreyê îdîanameyî guleyê çekanê qirkerdişî aîdê çekanê qoricîyan ê.

Îdîaname de pêro vergumanî sûcê 'qestî ra kiştişî' ra yenê hukmkerdene. Roniştişo verên ê dewa 14ê kanûne de Mehkemeya Cezaya Girane ya 7. de do bêro kerdene.