Amed û Wan de çalakîyê Nobeta Edaletî yê keyeyanê tepişteyanê nêweşan û tepişteyanê ke înfazê înan ameyo vêşnayene dewam kenê. Çalakîkeran waşt ke tepişteyê nêweşî cade bêrê veradayene.

Baroyê Amedî de roja 97. ya çalakîye de bale ameye antene serebûrê mergî yê zîndanan ser. Endamanê Rêxistina DBPyî ya Rezan a Amedî çalakîkerî zîyaret kerdî. Îdarekara DBPyî ya Rezanî Meryeme Tura zîyaret de vat: ''Dadîyî seba edaletî nobete kenê. Edalet seba pêro merdimîye girîng o. Ma dest bidê destî û verê merganê zîndanan bigêrê.''

Herdeme Mervanî nameyê keyeyanê çalakîye ser o qisey kerd û vat: ''Ma bi wijdanî wayîrê tepişteyanê nêweşan vejîyê. Wa zîndanî mebê warê mergî. Tepişteyê nêweşî wa cade bêrê veradayene.''

Baroyê Wanî de zî çalakîya nobete roja 70. de ya. Îdarekaranê Şubeyê Wanî yê MEBYA-DERî çalakîkerî zîyaret kerdî. Hemsereka Şubeyê Wanî yê MEBYA-DERî Hanime Kaya îfade kerd ke ê hetê keyeyan de yê. Kaya veng da ke sere de Aysele Tugluk pêro tepişteyê nêweşî wa bêrê veradayene.