Rêxisitan Partîya Demokratîke ya Şaran (HDP) ya Amedî bi eşkerayîya çapemenîye Komployê 9ê Teşrîna Verêne yê vera Rayberê Şarê Kurdî Abullah Ocalanî  protesto kerd.

Çalakîya ke Yenîşehîr de ameyekerdene Hemserekê Pêroyî yê Partîya Herêman ê Demokratîkan (DBP) Salîha Aydeniz, Keskîn Bayindirî, parlementerê HDPyî Tayyîp Temel, Remzîye Tosun, Dersime Deg, Semra Guzel, Îmam Taşçier û temsîlkarê Kongreya Komelê Demokratîkî (KCD), Têgêrayîşê Cinîyan ê Azadan (TJA) û  xeylêk partîyanê sîyasîyan û rêxistinê komelê sîvîlî tewrê ci bîyî. Kîtleyo ke bi sloganan xoverdayîşê Îmraliyî selam kerd hetê TOMA û wesayîtanê zirxinan ê polîsan ra gerîya binê ablûqa. Çalakwana bi sloganan verê Kuçeyê Sanatî rayraşîyayîşêk kerd.

Salîha Aydenîza ke çalakîye de qisey kerd bale ante ser ke komplo ewro sey tecrîdî dewam keno û vat: ''Xora çîyê ke ewro çar leteyanê Kurdîstanî de qewimîyenê dewamê komplo yê. Ma hemeyan dîyî ke Abdullah Ocalanî senî semedê haştîye xîret kerd. Eke berê Îmralîyî bibo a, verê demokrasîyî zî abeno. Sey îqtîdaranê verênan AKP zî bi tecrîdî peynîya xo ano. Ma do heta wedaritişê tecrîdî têkoşîn bikerê.''

Tayyîp Temelî zî bale ante ser ke ê binê ablûqa de yê û vat: ''Ma nê meydan de vînenê ke Tirkîya de tecrîd yeno çi mana. Wazenê ke şarî rayîrê birêz Ocalanî ra peyser açernê  û bêveng bikerê. Manaya tecrîdî dişmenîya kurdan a. Îmrali de şarêk gerîyo binê tecrîdî. Ma ewro reyna meydanê Amedî ra veng danê; şarê kurdî, merdimê wayîrê vîjdanî û şarê Tirkîya yo ke waybiratîya şaran ra bawerîya ci esta,  bêrê ma pêro pîya tecrîdî bişiknê. Azadîya birêz Ocalanî azadîya şaranê Tirkîya ya.''

Reyna Riha, Mêrdîn, Şirnex û xeylêk bajaranê bînan ê Kurdîstanî de zî bi çalakîyan komlo ame protestokerdene û azadîya Ocalanî ameye waştene.