Şorişgêro kurd Anter Dêrsim (Kazim Ergun) Kampa Multecîyan a Şehîd Rûstem Cûdîyî (Mexmûr) de ame yadkerdene û seba ci xeyma serweşîye ameye akerdene.

Merasîmê yadkerdişî Dezgehê Keyeyanê Şehîdan ê Mexmûrî de bi beşdarîya xeylêk merdiman ame kerdene. Dima Hemvervatoxa Komîteya Keyeyanê Şehîdan Sultane Yildiztan qisey kerd.

Sultane vist vîrî ke Anter serranê 90an de tewrê şorişî bibi û ey zulmê dewlete nêzdî ra dîbî. Sultane vat: ''Ma sey şarê Mexmûrî qetî ey xo vîr a nêkerê. Ma sey teqîbkerdoxanê şehîdan heta peynî vera îşxalkeran sey Anterî xo ver bidê. Ma soz danê ke xeyalanê şehîdan bîyarê ca.''

Merasîm pê slogananê sey 'Şehîdî nêmirenî', 'Bê serek cuye nêbena' û 'Biciwîyo xoverdayîşê gerîlayan' qedîya.

Dima Dezgehê Keyeyanê Şehîdan de seba Anter Dêrsimî xeyma serweşîye ameye akerdene.