Endama Konseya Hemserekîya Pêroyî ya KCKyî Sozdar Avesta cewab da persanê ANFyî. 

Beşê diyînî yê qiseykerdişê Avesta ra qismêk wina yo:

''Şingal 9ê teşrîna verêne ra nata vera peymana PDK û Iraqî xo ver dano. Şingalijî çend reyî maruzê qirkerdişî mendî. Şarê Şingalî sey verê 2014î nîyo. Êzidîyî seba ke reyna nêrê qirkerdene na peymane qebul nêkenê. Şingalijî xoserîye, hêzanê xopawitişî wazenê. Qanûno bingeyî yê Iraqî zî destûr dano nînan. Êzidîyî nêwazenê dewletêka bîne ronê. Rixmê nê çîyan zî na peymane de fikr û îradeyê êzidîyan nêameyî girewtene. 

Hukmatê Iraqî pê tedaya PDK û dewleta tirke seba ke emrê xo derg bikero wazeno Şingal qurban bido. Eke Iraq wina têbigêro Şingalî ra dima parçeyê ci yê bînî zî do destê Iraqî ra şorê. Ganî Iraq na mesele pê dîyalogan çareser bikero û îradeyê êzidîyan bişinasno.

PDKyî bawerîya êzidîyan esîr kerda û xo zî teslîmê Tirkîya kerdo. PDK dişmenîya Şingal û êzidîyan keno. Êzidîyî zî hînî zanenê ke PDK verê înan de senî têgêreno. Şarê Şingalî 6 serran ra nata xo îdare kerdêne û pawitêne. La PDK mîyanê êzidîyan de têmîyanî û alozîye virazeno. PDK Başûrê Kurdîstanî de bi hîşmendîya qirkerdişî têgêreno û wazeno êzidîyan werte ra wedaro. 

Bedelê ci se beno wa bibo şingalijî do pê têkoşîn û xoverdayîşî waştişanê xo yê meşrûyan heta peynî bipawê. Xoverdayîş û paştdayîşê şarê Şingalî do na peymane bikero pûç.

Eke na peymane bêra caardene êzidîyî û Êzidxan do reyna bibê kole. Coka ganî xoverdayîş dewam bikero. Wa êzidîyî xeyman ronê, çalakîyan, grevê vêşanîye bikerê û rêxstinîya xo bîyarê ca. Wa êzidîyî verê Neteweyanê Yewbîyayeyan de ronişê. Êzidîyê teberê welatî zî ganî çalakîyanê bitesîran bikerê.

Dewleta tirke PDK esîr girewto. PDK Xakûrkê, Heftanîn, Metîna ra heta Koyê Şingalî seba îşxalê Tirkîya akeno. Dewleta tirke nê cayan de bi desan baregehî ronayî. PDK bi nê hawayî xo qedîneno. PDKyî rayîrê xo şaş kerdo, dekewto rayîrêkê xelet û bitehlukeyî.

PDK herinda ke meseleyanê şarê Başûrî çareser bikero venga Iraqî dano ke peymana Şingalî bîyaro ca û venga dewleta tirkan dano ke wa bêra. Çalakîyê nikayênî yê şarê Başûrî netîceyê polîtîkayanê PDK û dewleta tirke yê.

Gerîlayan emser zî vera hêrişanê îmha û çinkerdişî bi hawayêkê serkewteyî xo ver da. Gerîlayan mojna ke ê do serra 2021î de  azadîya şarê xo bîyarê ca.Xora ma şehîdî dayî. Ez pêro şehîdan bi minetî yad kena û bi taybetî hêzanê YJA-Starî rê selamanê xo erşawena. Hêzê YJA-Starî qesasê cinîyan gênê ke nê cinîyî Şingal de esîr bîyê, qir bîyê, îşkenceyî dîyê, maruzê tacîz û tecawuzan bîyê gênê. 

Destkewteyê ma netîceyê têkoşînê 50 serran ê. Rixmê hende hêrişan zî seba cuya azadîye ya paradîgmaya Rayber Apoyî têkoşînê pîlî ameyî kerdene. Ma venga partî û sîyasetmedaranê kurdan danê ke Şingal, Başûr û Vakurê Kurdîstanî de qirkerdişo sîyasî dewam keno. Rojhelatê Kurdîstanî de heqê cinî, merdiman yenê binpaykerdene. Hemleya ma her parçeyê Kurdîstanî de û teberê welatî de zaf veng vet. 

Kurdî, dostê kurdan, hêzê demokrasî û muxalefetî ganî hêzanê xo bikerê yew û vera dewleta faşîste têkoşînê azadîye berz bikerê. Ganî partîyê kurdan menfaatanê neteweyîyan vejê vernî. Ma sey Têgêrayîşê Azadîye her wextî ra zêdêr xîretanê seba yewîya neteweyîye bizêdînê. Ma pê hêvîdar ê ke rayberîya KNKyî de xebatê yewîya neteweyîye do dewam bikerê. 

Ma pê bawer kenê ke têkoşîn û xoverdayîş do dewam bikerê û nê wirdî serra 2021î seba kurdan, şaranê herême û pêro cinîyan bikerê serra azadîye.''