Endamê Komîteya Merkezî ya PKKyî Muzaffer Ayatayî cewab da pesanê ANFyî. Qiseykerdişê Ayatayî ra qismêk wina yo:

''Komployî 25 serrî xo dima verdayî la hema zî kayê ke dormeyê Îraliyî de yenê kaykerdene, hesabê sîyasîyî, zext û cehdkerdişê tesfîyekerdişî nêqedîyayî. Seba ke na rewşe pabesteya meseleya kurdan a, rewşa tarîxî ya ke wina lez nînan çareserkerdene. Meseleya kurdan hinî bîya projeyê qirkerdişî yê mîyanneteweyî. Îmrali de tecrîd dewam keno. Heme heqê merdiman yenê binpaykerdene. No projeyêko gird yê qirkerdişî yo. Projeyê tesfîyekerdişî yo. Îmrali sey merkezê projeyî yeno destgirewtene. Heme prosesî eslê xo dormeyê Îmraliyî de gêrayî. Roja qerarê îdamî  zî raştê roja îdamê Şêx Seîdî ameye.  Yanî bi hukmkerdişê Rayberîye kewtê mîyanê hesapbersayîşê tarîxî yê meseleya kurdan. Bi nê hukmkerdişê waştêne ke qirkerdiş wa Îmrali de ser bikewo. La Rayberîye destûr nêda, planê înan betal kerdî. Şarê kurdî dormeyê Rayberê xo de ame têhet, wayîrê ey vejîya. Çalakîyê 'Şima Nêeşkenê Tîja Ma Tarî Bikerî' ameyî kerdene. Bi desan kesanê ke tehlukeyê çînkerdişê kurdan ferq kerd, semedê pawitişê Rayberê xo bedenê xo tafîna.

Ewro zî bi eynî waştişî Îdarekarê dewleta tirke kenê ke Îmraliyî şarî ra rakilnê ke têgêrayîşê kurdan vila bikerê.  Wazenê ke qirkerdişî temam bikerê.  Tesîrê Rayberîye yê serê gerîla û şarî her kes zano. Şar pê Rayberê xo bawer o û paştîya ci ey ra pêt a. Zano ke heme şertan de o eşkeno rayîrê çareserî abikero. Zaf tesîrê Rayberîye şarê kurdî û gerîlayan ser o est o. Coka tira tersenê. Nêeşkayî Rayberîye vindarnê. Heme medotî ceribnayî la se kerd nê kerd nêeşkayî Rayberîye şar û partîya ci ra raqilnê. Înan çend zext kerd, planê xo yê leyminî vîstî dewre, şar zafêr wayîrê Rayberê xo vejîya û têgêrayîş dahîna gird bi.  Coka badê 2014î înan qerarê şerê topyekunî girewt. Erdoganî ra dîktatorêk aferna, demokrasî binate ra wedarit û her çî fîna xizmetê şerî. Eke şerê vera kurdan ra nêbîyêne dewlete wina Erdoganî rê nêameyêne peşkeşkerdene.

 Xora Amerîka û Yewîya Ewropa zî hamparê polîtîayanê tecrîdî yê. Huqûqê Ewropa yeno binpaykerdene. Qerarê Mehkemeya Heqanê Merdiman ê Ewropa nînê caardene. CPT ameyo bêtesîrkerdene. Vera tecrîdî bêvengîye est a. No qebulkerdişê tecrîdî yo. Tecrîd semedê qirkerdişê kurdan û tesfîyekerdişê Têgêrayîşê Kurdan yeno kerdene.  Dewleta tirke ya faşîste ya ke vindertişê biheybetî yê Rayberîye ra tersena heqê merdiman, huqûq, wîjdan hetêkî de verdayî, çimê xo girewtî bi zordarîye tecrîdê Îmraliyî dana domnayene.

Sîstemê emperyalîstî ke sereyê ci Amerîka anceno, PKK girewt 'lîsteya terorî' ke meşrûyêtê ci çîn bikero.  Eke PKK wayîrê fikr û felsefe nêbo, senî eşkeno 50 serrî vera artêşa girde ya diyîne ya NATOyî de payra bimano. Rayberîye serkêşo tewr gird ê têkoşînê vera DAÎŞî yo.  Rayerîye vat DAÎŞ ça de yo, şima do heta ûca şirê şer bikerê.  Wîna nêbîyêne Kobanê nêameyêne xelisnayene.  Kurdî nêşîyêne Reqa, Dêrazor û Minbic de şer nêkerdêne.  Hêzanê sey PDK û ENKS vatêne şima qey ciwananê kurdan bêne, kenê qûrbanê ereban. Eke çarçaweya Rayberîye de biameyêne têgêrayêne  ewro rewşa Kurdîstanî  dahîna hole bîyêne.

Dewleta tirke hêrişê Rojawan û Başûrê Kurdîstanî kena. Wazena Kurdîstanî teslîm bigêro, vila bikero, şarê kurdî teslîm bîgêro û biqedîno. Rixmê heme cehdkerdişê Rayberîye, Tirkîya semedê haştîye gamêke nêeşte. Rayberîye zaf ser vindet, vat bêrê ma ma yew hewte de mesele hal bikerê. Projeyê ci est o, pê xo bawer o. La Tirkîya têna rewşe giranêr kena, şerî xorî kena. Erdoganî heme estbîyayîşê Tirkîya semedê şerî xerc kerdî. Erdoganî kurdî vînî kerdî, teber de îtîbarê xo vînî kerd.

Barê şikitişê tecrîdî milê şarî de yo. Eke şar pîya bi gerîlayan bibo yew û têkoşînê xo gird bikero, cepheyê demokratîkî xurt bikero, bi şerê şarê şorişgêrî eşkeno komployê Îmraliyî betal bikero, berê Îmraliyî abikero. Kurdî mojnenê merdimîye ke do dinya teslîmê faşîstanê tirkan nêbo. Verî dişmenê kurdan, kurdî dayêne naskerdene. Sey eşqîya, terorîstî pênas kerdêne. La nika o rijîya. Kurdî hinî bi nameyê xo qisey kenê û rayîrê resayîşê dinya akerdî. Nê do dahîna aver bêrê. Bi nê hewayî do komplo û tecrîd birijîyê.''