1ê kanûne de Wargehê Wendekaran ê Pîr Alîyî yê Çewlîgî de wendekara bi nameyê Şîfanure bi hawayêkê şikdarî merdbî. 6ê kanûne de zî camêrdêko hêrişkar pê kardî dekewtbi zere û vejîyabi qata hîrêyîne.

HDPyî yê Çewlîgî Erdal Aydemîrî derheqê babete de vernîyazêkê persî da Meclîsî. Aydemîrî da zanayene ke serebûtê ke wargeh de qewimîyenê şaristan de benê sebebê qesawetî.

Aydemîrî vat: ''Serebûtê Şîfanure ra hewteyêkî pey camêrdêk pê kardî dekewto wargeh û wendekaran rê gef wendo. Wendekaran dima baxçeyê wargehî de semedo ke asayîşê ganê înan çin o çalakîyêke kerde. Wendekaran bi xo ard ziwan ke hêzanê asayîşî û îdareyê wargehî înan rê gefê tehqîqatî wendo. No tewirê hêzanê asayîşî ganî bi hawayêkê cidîyî bêro ercnayene.''

Aydemîrî nê persî pers kerdî:

-Wargehê Pîr Alîyî de se beno? Tehqîqatê derheqê xokiştişê Şîfanure de kamyew aste de yo?

-Camêrdo ke kewto wargehî kam o? Derheqê ey de tehqîqatêk dîya destpêkerdene?

-Serebûtê camêrdê bi karî mojneno ke wargeh de tedbîrê asayîşî qels ê. Şima na babete de do se bikerê?