Fermandaranê Qerargehê Merkezî yê Pawitişê Şarî (MPŞ) Bahoz Erdalî vat operasyono ke Xakurkê de dewam keno perçeyêkê konseptê îşxalê Kurdistanî yo û na hayîya muhîme daye: „Wazenê serê xeta sînorî ya na herêma Îranî ra bikewê erdê Başûrê Kurdistanî. Xakurkê ra, Xinêre ra û dergîya sînorî ra wazenê gerîlayan vejê û tayê Amerîkayijan bica bikerê. Nê de zî amac no yo ke ambargoyê serê Îranî hîna bikerê xurt.“

 Fermandaranê Qerargehê Merkezê Pawitişê Şarî ra Bahoz Erdalî programê taybetî yê Stêrk TV’yî de operasyone leşkerî yê dewleta Tirkî yo ke hemverê Wareyê Pawitişî yê Medya de ameyo destpêkerdene, tewirê hukmatê Başûrê Kurdistanî, çalakîya Huqqabazî ya ke nê wextanê peyênan de virazîyaye, xebatê ajanîye yê ke yenê waştene Başûrê Kurdistanî de bêrê hîrakerdene û eleqedarê babetanê rojdemî de cewabê persan dayî.

 Erdalî qiseykerdişê xo de nê vatî: ''Hîrê sebebî estê ke hêrişê herêmanê tîyayî kenê. Yo yewin Îranî dir eleqedar o. Yanî sserê sînorê Îranî de israr kenê. Wazenê serê xeta sînorî yê a herême ke pabesteya Îranî ya, aye ra bikewê Başûrê Kurdistanî. Wazenê gerîlayan Xakurkê ra, Xinêre û dergîya sînorî ra vejê û tayê komanê Amerîkayijan bica bikerê. Nê de zî amac no yo ke ambargoyê serê Îranî hîna bikerê xurt. No sebebo yewin o. sebebo dîyin bincewêk bo zî wazena ke erdê Kurdistanî îşxal bikero û bikero kolonîya xo. Çi Rojawan de çi zî Başûr de seba dewêk bo zî gama firsend bivîno wazena ûca bikero kolonîya xo. Yo hîrêyin zî amacê înan PKK yo. Seba ke nê amacanê xo bica bîyarê PKK’yî kenê bahane. Ma sey PKK û gerîlayê têgêrayîşê azadîye bi xoverdayîşî cewabê nê hêrişan danê.

Derheqê babeta Hewlêrî de ma cade eşkerayî nêdaye. Ma zî waşt ke heme rastîyanê nê qewimîyayîşî bimûsê. Ma derheqê ci de tayê cigêrayîşî kerdî. Netîceyo ke ma resayê ci no yo: Yo yewin o keso ke ameyo kiştene Osman Kose dîplomatêk nêyo. Mesuldarê MÎT’î yê Başûrê Kurdistanî yo. Yanî mesuldarê xebatanê MÎT’î yê hemverê ma yo. Binê banê MÎT’î de beşêk esto; amac û wezîfeyê înan o yo ke hemverê îdareyê ma de xebatan organîze bikero û îdareyê ma hedef gêno. Plan û waştişê înan ê hêriş û suyîqestan estê. No keso ke ameyo kiştene, mesuldarê yewîya MÎT’î yê Başûrê Kurdistanî yo ke wazeno hemverê îdareyê têgêrayîşê ma suyîqestan virazo. Nê kesî ê xebatan rê rayberîye kerdêne.

Axir mesuldarê hêrişo ke bi sebebê şehadetê Helmetî (Dîyar Xerîbî) û her di hemrayanê ma yê bînan no kes o. Dimayo ke çalakîye plan keno û hayîyan servîs keno, hemverê cayê hemra Helmetî de hêriş virazîyeno û ûca Hemra Helmet û di embazî şehîd kewenê. Ancî xeylî hêrişê serê Başûrê Kurdistanî hetê nê kesî ra ameyêne kontrolkerdene. Yew netîceyo ke ma resayî ci no yo.

Xusûsêko bîn o muhîm; dewleta Tirkî rojanê ewilênan de nasnameyê no keso ke ame kiştene eşkera zî nêkerd. La dima mecbûr mende û eşkera kerd. Labelê reyna zî tayê hayîdarîyî nimitî. Heme selahîyetdarê dewlete tewrê cenazeya ê bîyî. Ancî musteşarê MÎT’î zî tewrê ci bi. Yanî merasîmê cenazeya ê ra bewlî beno ke kesêko alelade nêyo. Waşt ke rastîyan serûbin bikerê û ê sey dîplomatî ramojnê.

 Goreyê heme cigêrayîş û netîceyanê ke ma resayê ci na çalakî çalakîyêka tayê ciwananê welatperweran a. Seke çalakîyêka tayê ciwanan ê ke zerrî ra têgêrayîşê ma rê pabeste yê asena. Çunke çalakîya gerîlayan hîna bi profesyonelî yena kerdene. Nimûne operasyonê Sakîne Cansize yê gerîlayan o ke hemverê îdareyê MÎT’î ame viraştene, operasyonêko taybet bi. Na çalakîye de tayê amatorîyî estê. La kamî na çalakîye viraşta çalakîyêka rind û serkewtî ya. Ma vanê destê şima weş bê û çalakgeran pîroz kenê. Înan no mesuldarê MÎT’î yo gonîwer ceza kerd. Înan kiştoxê hemra Helmetî kişt û no kes mesuldarê xeylî hêrişanê hemverê Kurdan bi. Çalakîyêka ercaye ya. Ma ciwananê ke na çalakîye viraşta pîroz kenê.

 Waştişê ma şarê ma yê Başûrê Kurdistanî ra no yo; kam beno wa bibo, gama ke kesêk waşt cayê gerîlayan bizano, bizanê ke nê kesî ajan ê û têkilîya înan MÎT’ê Tirkî dir esta, nîyetê înan xirab o. Rasterast hayîdarîyanê înan bidê gerîlayan. Tekrar ez ana ziwan kamcîn partîye ra beno wa bibo, reyna payeyê ci çi beno wa bibo êyê ke wazenê nuqteyanê gerîlayan bizanê, wazenê destê şima zî bikerê mîyanê gonîya Kurdan. Ê seba MÎT’î xebetênê. Wazenê bi şima sûc bidê kerdene. Çîyo ke ma şima ra wazenê raste rast hayîye bidê gerîlayan. Bi hayîyanê ke şima do bidê gerîlayan do kayê dişmenî veng a şiro.

 Seba çar perçeyanê Kurdistanî ma ancî veng danê ke dîyalog bêro kerdene. Ma verî zî vengdayîş kerd. Cayê xo kîşta dewleta Tirkî ya ke hemverê gerîlayan de şer dayo destpêkerdene de megêrê. Gerîla qurban nêyo. Nê gerîlayê nê welatî yê. Do kesanê ke destê înan gonîya gerîlayan de esta, înan ra qetîyen hesab bêro persayene. Ganî no wina bêro zanayene.

 Ez şexsê Şehîd Xebat, Şehîd Arîn Mîrkan û heme şehîdanê şorişê Rojawanî de serrgêra Şorişî pîroz kena. Rojawan de bedelê giranî ameyî dayene. Destkewteyê pîlî ameyî destfînayene. Ganî şarê man ê bizanê. Ganî şarê ma şerî rind analîz bikero. Goreyê na rastîye tê bigêro. Pawitişê Rojawanî tena gureyê YPG û QSD’yî nêyo. Gureyê heme şaranê Rojawanî yo. Eke şarê Rojawanî qezencanê ke kewtê dest rê wayîrîye bikero, ne dewleta Tirkî û ne zî hêzêko bîn eşkeno hêrişê înan bikero.“