Çalakîya nobete ya vera destsernayîşê Şaredarîya Colemêrgî dewam kena. Ewro Hemserekê DEM Partî Tuncer Bakirhanî heyetê xo reyde Gever zîyaret kerd. Bakirhanî Gever de esnafî zîyaret kerdî û dima xîtabê şarî kerd.

Bakirhanî ard ziwan ke şarê kurdî hinî qeyûman û destsernayîşan nêwazeno û vat: ''Şarê Colemêrgî tewirê xo eşkera kerd. Ma AKPyî hişyar kenê; cade qeyûmê xo apey biance. Eke şima wazenê bêrê kurdan de ronişê ke meseleyan çareser bikerê. Eke şima wina nêkerê zî kurdî do tim xo ver bidê. Xoverdayîşê şarî tank û topanê înan ra pîlêr o. 

Şarî 31ê adare de mesajê xo dabi şima. Kurdî wazenê bi hawayêkê rûmetênî biciwîyê. Ma do tim hetê şarê Colemêrgî de bibê. Naye ra pey kurdê rûmetênê ganî verê bînaya AKPyî ra zî derbaz nêbê. Xoverdayîşê şarî her çî ra û her kesî ra pîlêr o. Ganî her kes paştî bido xoverdayîşê şarê Colemêrgî. Ganî ma verê hişmendîya înkarkere de sereyê xo nêarê war. Ma do qeyûmê xespkerî erdê xo ra bişawê.''