Raporê zîndanan o ke hetê Komîsyonê Zîndanî yê Baroya Wanî ra ame hadrekerdene, banê baro de bi kombîyayîşê çapemenî rayapêroyîye rê ame eşkerakerdene.

Dimayê muracatê Mahsûm Yuksekbag û Tacettîn Turanî yê ke gama Zîndanê Girewteyî yê Tîpê Tyî yê Tekîrdagî yê 1. ra Zîndanê Girewteyî yê Tîpê Tyî yê Beşîkduzu yê Trabzonî rê ameybî sirgûnkerdene raştê îşkenceyî ameybî endamê Komîsyonê Zîndanî yê Baroya Wanî kewtî mîyanê têgêrayîşî.     

Avûkat Fehîm Yacanî bale ante qalkerdişanê tepişte Hîlmî Ozsoyî û vat ke Ozsoy hetê wezîfedaranê înfazî ra ameyo virankerdene, ameyo kuwayene, serreyê ci ameyo şikitene û îşkenceyê psîkolojîkî ra dima narey zî gama ke ameyo berdene odeya gardîyanan ûca zî hetê di gardîyanan ra ameyo kuwayene. Yacanî da zanayene dimayo ke Ozsoy agêrayo koxuşa xo ya A15 şopê rîyê xo ramotê kamerayanê ke korîdor û koxuşe de bîyê.

Yacanî nê pare kerdî:

"Hemverê nê bicaardişanê teberê merdimayî de ma şîyî zîndanê Beşîkduzu yê Trabzonî. Amacê ma tesbîtkerdişê binpaykerdişanê heqanê merdiman ê ûcayî bi. Ê tepişteyî raştê îşkenceyî ameyê. Gama kuwayîşî de kamerayî yenê girewtene."

Goreyê qalkerdişanê tepişteyan Cemal Nanîr, Maznûn Ozagar, Ozgur Gurbuz, Kerem Karagoz û Enes Aydoganî seba îşkenceyo ke ameyo kerdene ‘talîmatê Wezaretê Edaletî‘ vajîyayo."

Endamê Komîsyonê Heqanê Merdiman ê Baroya Wanî Fehîm Yacanî vînayîşê heyetî wina ardî ziwan:

"Çimê Mahsûm Yuksekbagî yê tepişteyî de çimê êyê çepî de gonî amîya pêser, netîceyê ekîmozî yê derbeyî de dormeyê çimê ê zî rengêko zergûn girewto. Ancî kîşta zinca ê de şopa birînêk ke tole eşto estbi. Reyna destê ê de zî şopa derbeyan estbî.

(…) Rixmê ravêrtişê 2 hewteyî ra hewna zî şopê derb û îşkenceyî bi hawayêkê eşkerayî asayêne. Na nuqte de fam bîyo ke hemverê tepişteyan de sûcê îşkenceyî ameyo bicaardene."