Seba ke meaşê karmendan nêdîyenê û kêmîyenê Başûrê Kurdîstanî vera huıkmat û partîyan çalakîyê protestoyî vila benê.

Çalakîyî rojanê peyênan de geşêr bîyî. Xeylêk şaristanan de bînayê partîyan ameyî vêşnayene, tewr tay 2 kesî merdî, bi desan kesî birîndar bîyî û ameyî destbendkerdene.

Şarezûr

Qezaya Şarezûrî ya Silêmanî de çalakîyan şewe dest pêkerd. Şarî kuçeyan de adir tavist û trafîk girewt. Hêzanê partîyan hêrişê şarî kerd û hêriş de ciwanêk birîndar bi.

Derbendîxan

Qezaya Derbendîxanî ya Silêmanî de bînaya qeymaqamî û Têgêrayîşê Goranî ameyî vêşnayene. Çalakîkeran verê xo da bînaya PDKyî. Hêzanê asayîşî hêrişê çalakîkeran kerd û netîce de çalakîkerêk/e birîndar bi/ye. Hêzanê asayîşî yê YNKyî zî hêrişê çalakîkeran kerd.

Germîyan

Çalakîkeran bînaya Goranîda kerrayan ver û hêzanê asayîşî guleyî eştî şarî ser. Kifrî de zî bînaya YNKyî ameye vêşnayene. Ako Selman (17) guleyanê asayîşî ra merd. Çalakîkera dima verê xo da partîyanê PDK û Goranî. Çemçemal de zî ciwanêko 16 serre merd û 2 kesî birîndar bîyî. Ame parekerdene keciwanê bi nameyê Adem Yanha pê guleyanê PDKyî kişîya.

Ranya

Hêzanê asayîşî hêrişê çalakîkeran kerd û tewr tay 20 çalakîkerî birîndar bîyî û hende çalakîkerî zî ameyî destbendkerdene. Çalakîyan qasê 3 saetan dewam kerd.

Seyîd Sadiq

Seyîd Sadiqî yê Silêmanî de çalakîyan de xeylêk bînayê partîyanê sey PDK, YNK, Komela Îslamî, Goran ameyî vêşnayene. Nê çalakîyan de zî xeylêk kesî birîndar bîyî.

Hewteyê peyênî de herême de bi desan kesî ameyî destbendkerdene la hûmara zelale nêzanîyena. Rêxistinê heqanê merdiman zî tedaya hêzan ê çekdaran ra qerqilîyenê. Dişeme asayîşî televîzyonê NRTyî girewt, buroyê ci yê Silêmanî qefilnayî û weşan vindarna. NRT aîdê îdarekarê partîya Naway Nwe Şaswar Evdilwahidî yo.