Hemserekê Konseya Rayberdişî ya KCK’yî Cemîl Bayikî  derheqê tecrîdê serê Rayberê Şarê Kurdî Abdullah Ocalanî, sîyasetê Tirkî, hêrişê qirkerdişê vera Şengalî, hêrişê îşxalî yê vera Başûrî, tehdîtê dewleta Tirkî yê vera Rojawanî û xeta 3. de ANF’yî rê qisey kerd.

Bayikî ard vîrî  ke Ocalanî vatbi ke do dimayê 23’ê Hezîrane rewşe zelal bibe û vat:’’ Rayberîye vatbi ke mengêk de do zelal bibo pêvînayîşê dewam kenê yan zî nê. Nika pêvînayîşî dewam nêkenê. Hem qanûnê mîyanneteweyîyî hem zî qanûnanê xo binpay kenê. Wezîrê Edelatî vatbi ke vernîya pêvînayîşan de  antengîye çîna la dimaye weçînitişî no xovîr ra kerd. Şarê ke wazenê Tirkîya bibo demokratîk ganî nê şîyayîş rê vajê êdî bes o. No sîyaset şerî werte ra wenêdareno. Goreyê înan bi nameyê Kurd û Kurdistanî her çî suc o.  Goreyê înan seba ke Rayber Apo wayîr Kurdan,  şaran û hêzanê demokrasî vejîyeno sucdar o.  Coka vera ey wehşet û polîtîkaya zûlumî danê domnayene. Ganî her kes naye hol fam bikero. Eke semedê Tirkîya haştîye û hûzûr yeno waştene ganî tecrîdê serê Rayberîye bêro wedartene.’’

Erdogan û Bahçelî Sîyasetê Qirkerdişî Rayra Benê

Bayikî bale ante serê polîtîkaya hêrişkare ya AKP-MHP’yî ya vera Kurdan û va: ‘’Erdogan û Bahçelî vanê ma vera Kurdan nêyê, vera PKK yê. Wina şarî xapînenê û wazenê biresê hedefê xo. Dewleta Tirkî ya îşxalkare tarîxî ra çînkerdişê Kurdan xo rê kerdo hedef û semedê naye parçekerdişê Kurdan tim amencê înan o. Tirkîya tena Kurdanê Vakurê Kurdistanî rê nê heme Kurdan rê dişmenîye kena û wazena ke destkewteyanê înan dest ra bîgêro. Rayapêroyîye xapînenê vanê ‘ ma vera PKK’yî şer kenê, ça de PKK bibo ma şinê ûca.’ Rojawan û Başûr de zî tayî Kurdî vanê raşto, seba ke PKK tîya yo ê hêrişê ma kenê. Mesele estbîyayîşê PKK’yî nêyo. Naye her kes zano.  PKK namûs û şerefê Kurdan paweno. Sebebê hêrişê Tirkîya no yo. Şexsê PKK’yî de hêrişê heme Kurdan kenê. Kurdî ganî naye bivînê û vera ci serwadarê. Eke ewro dewleta Tirkî Rojawan û Başûr de hêriş keno Başûr û Rojawan de tayînan  ra paşt girewta coka. Eke hetkarî çînêbîn MÎT’î senî Qendîl de embaz Helmet şehîd kerdêne? Tayî cayan ra paşt gênê ke qetlîam kenê.Tirkîye vana ‘artêşa ma pîya bi MÎT’î operasyon virazena’ Kurdî, hukmat senî naye qebûl kenê. Nê vanê çî karê înan tîya esto? No sîyaset Kurdan rê dano vînkerdene.

PKK Destkewteyanê Başûrî Paweno

PKK destkewteyanê Başûrê Kurdistanî zî paweno. Xora destkewteyê Başûrî zî xeyrê PKK’yî estî. PKK dişmen nê dostê Başûrî yo. Gama ke DAÎŞ’î hêriş kerd kam vazda hetkarîya Başûrî? PKK vazda. Naye şarê Başûr zî dewlete zî zana. Eke gerîla mudaxalê nêkerdêne ê heta Hewlêrî şîyêne. Birêz Mesût Barzanî şi Mexmûr û gerîlayî rê spas kerd. PKK ganî senî zirar bido ? Erco tewr pîl ê şarê Başûrî PKK yo.  Coka nê demî de yewîya neteweyîye rê hewcadarî esta. Tirkîya wazena ke Kurdî xo mîyan de têmîyan bikewê . Ganî Kurdî vera naye hîşyar bê û pîya tê bigêrê.

Planê Tirkîye oyo ke Kurdan perçe bikero biverdo yewbînan. Kurdan ê Vakur û Başûrî û Vakur û Rojawanî cêser bifîno û erdê înan ra vejo. Wazenê ke Kurdan cayê înan ra vejî û herinda înan de merdimê ke goreyê înanê bica bikerê. Heman wextî de sey Efrîn wazenê çeteyanê xo zî nê cayan de bica bikerê. Şarê Kurdî ganî naye hol bivîno û vera ci bivejîyo. Reyna şarê Vakurê Sûrîye zî ganî amancê Tirkîya hol fam bikero û goreyê ci tê bigêro. Bayikî bale ante hêrişê serê Êzidîyan û va:’’ Semedê qirkerdişî hêrişê Êzidîyan kerd. Qey hendî fermanî vera Kurdan ameyî kerdene? Êzidîyî qoqê Kurdan ê coka. Ê ke wazenê Kurdan çîn bikerê,  ganî verê Êzidîyan çîn bikerê. Şengal de  Êzidîyan rê wayîrvejîyayîş, Kurdan rê wayîrvejîyayîş o.

Rayber Apo û PKK Xeta Hîrêne Temsîl Kenê

Hemserekê Konseya Rayberdişî ya KCK’yî Cemîl Bayikî ard ziwan ke Rojakewtena Mîyanêne de Şerê Dinya yê Hîrêyinî yeno ciwîyayene û va: ‘’ No şer çiwext qedîyeno zelal nêyo. Rojakewtana Mîyanêne de senî yew sîstem yeno awenkerdene bewlî nêyo. Nika hêzanê teberî dest nayo Rojakewtena Mîyanêne ser. Rayber Apo û PKK xeta hîrêne temsîl kenê. Xeta şaran temsîl kenê. Xeta verêne teber ra mudaxaleyê Rojakewtena Mîyanêne kerd. Xeta dîyine hêzê mîyanneteweyîyî yê ke Rojakewtena Mîyanêne de yê. Şarê herême vera înan xeta xo esas gêno. Xeta hîrêyine. Naye Rayber Apo û PKK temsîl kenê. Semedê şarê herême mucadele kenê. Seba ke azadîye û demokrasî bêrê Rojakewtena Mîyanêne mucadele kenê. Ewro KODAR û PJAK zî xetanê xo wina bewlî kenê. Xeta hîrêyine esas gênê û vanê ke ma nê kişta Amerîka de yê nê zî kişta Îranî de. Ma kişta demokrasî, şaran û wayeûbirayîye de yê. Problemanê Rojakewtena Mîyanêne tena şarê herême eşkenê çareser bikero. No zî bi sîstemêkê demokratîkî mumkun o. ‘’