Hemserekê Konseya Rayberdişî ya KCKyî Cemîl Bayikî bernameyê taybetî yê Stêrk TVyî de rojdem ercna. 

Qiseykerdişê Bayikî ra tay noqtayê girîngî wina yê:

''Ewro şexsê Rayber Apoyî de kurdî yenê tecrîdkerdene. Polîtîkaya dewlete ya esase qirkerdişê kurdan o. Coka Rayber Apoyo ke lîderê kurdan o yeno tecrîdkerdene. Tecrîdê Îmraliyî û cezayê dîsîplînî yê ke dîyenê Rayber Apoyî huqûqî nîyê. Ganî her kes vera tecrîdî têbigêro û seba azadîya Rayber Apoyî têkoşîn pîlêr bikero. Ganî tecrîd cade bêro wedaritene û Rayber Apo bieşko keye û avûkatanê xo bivîno. 

Erdlerzê 6ê Mereşî ra dima ma adirbirnayîş îlan kerd û adirbirnayîş heta weçînayîşanê gulane derg kerd. Ma waşt ke weçînayîşan de verê provakasyonan bigêrê. Rixmê bira ma ya adirbirnayîşî zî dewleta tirke hêrişanê xo rê bêmabên dewam kerd. Çunke vat ke gerîlayî qels bîyê. Hêrişanê dewleta tirke ra semed yew manaya adirbirnayîşî nêmende coka ma adirbirnayîş qedîna. Gerîlayan naye ra pey çalakîyê bitesîrî kerdî û Metîna û Xakurkê derbê giranî dayî piro. Îqtîdarê AKP-MHPyî her roje hêrişanê xo zêdîneno û şer keno pîlêr. Ganî şarê ma, demokratî, sosyalîstî û dostê ma verê na rewşe de bêveng nêmanê çunke şer çewî rê fayde nêkeno.  

Seke zanîyeno reyna kombîyayîşê Astan ame kerdene. La kombîyayîşê Astana yew mesele zî çareser nêkenê eqsê ci kenê pîlêr. Ewro dewleta tirke Rojawanê Kurdîstanî û Sûrîye de îşxalker a. Hêzê Mîyanneteweyî, hêzê Astana, NATO verê dewleta tirke de vengê xo nêvejenê. Heta ke dewleta tirke Sûrîye ra nêvejîya qet yew mesele çareser nêbena. Wextê Astana de Mesrûr Barzanî Tirkîya de Erdogan, Fîdan û Yaşar Gulerî de pêvînayîş kerd. Dima dewleta tirke Qamişlo de Yûsra Derwêş, Leymane Şiwêş û Firat Tuma şehîd kerdî. Nika her kesî rê meraq o ke Barzanîyî û dewleta tirke çira ser o birî dayê? Ganî nê bêrê eşkerakerdene. 

Şarê Rojawanî do qetî verê dewleta tirke de sereyê xo nêaro war û heta peynî têkoşîn bikero. Ganî pêro kurdî û merdimî zî wayîrê xoverdayîş û têkoşînê Rojawanî vejîyê. Dewleta tirke wazena hîna zaf hêrişê Rojawanî bikera, cayanê neweyan îşxal bikera. Ganî şarê Rojawanî vera hêrişan têkoşîn bikero, erdê xo meterikno. 

Weçînayîşan ra nata Îtîfaqê Kede û Azadîye bi giranî yeno rexnekerdene û nîqaşkerdene. Xora tay kêmasîyê nê îtîfaqî est bîyî. Ganî Îtîfaqê Kede û Azadîye komelî muxatab bigêro, xo bihêz bikero, îtîfaqê xo hîra bikero. Ganî îtîfaq bi îdeolojîya Îslamê demokratîkî şoro hetê şarî. Tay hêz û terefî qestî ra nê îtîfaqî kenê hedef. Nê hêrişê Rayber Apoyî, îtîfaqî û paradîgmaya PKKyî kenê. Nê kesî xo sey 'neteweperwerî' pênase kenê la vera dewlete tênêgêrenê; eqsê ci hetê dewlete de cagênê. Na senî neteweperwerî ya? A raşte nê kesî xizmetê dewleta tirke kenê. Coka nê prosesî de ganî ma hîna zaf wayîrê projeyê neteweya demokratîke yê Rayber Apoyî vejîyê.

Ez şexsê embaze Zîlane (Zeynepe Kinaci), Gulane û Sema de pêro şehîdanê şorişî bi rêzî yad kena. Embaze Zîlane bii çalakîya xo ya fedayîye mesajê pîlî dayî. Coka Rayber Apoyî vatbi 'Zîlane fermandara min a, ma zî şerwanê ci yê.' Ewro bi hezaran kesî bi nameyê Zîlane Kurdîstan de têkoşîn kenê. Partîya ma, gerîlayê ma zî bi ruhê Zîlane têkoşîn kenê. Seba ke bibê layîqê ci ganî ma xeta Zîlane ya fedayîye ser de şorê û na xete aver berê.

29ê hezîrane de Şêx Seîd 3u 46 embazê ci yê welatperwerî ameybî dardekerdene. Ez înan bi rêzî yad kena. Dewleta tirke ê çaxî ra nata kurdan rê teyna qirkerdiş rewa kena. Dewleta tirke ewro vera Rayber Apoyî û şarê kurdî zulmanê pîlan kena. Şarê ma xora nê raştîyan hol zaneno. Ez bi na wesîle pêro şehîdan bi rêzî yad kena û keyeyanê înan rê serweşîye wazena. Ez pêro embazan rê zî serkewtiş wazena.''