Hemserekê Konseya Rayberdişî ya KCK’yî Cemîl Bayikî netîceyê weçînitişê cayîyî yê 23’ê Hezîrane yê Stenbolî ANF’yî rê ercnayî.

Bayikî ard vîrî bloka AKP-MHP’yî weçînitiş de bi ferqêkê pîlî bin kewta û ard ziwan ke eke welatêko demokratîk bibîyêne do nê rayîrê netîceyanê xeylî cidîyan akerdêne.

Bayikî vat, “Labelê seba ke Tirkîya welatêko demokratîk nêya ma do wext ra bivînê ke no çî do îqtîdarê AKP-MHP’yî ser o tesîrêko senen bikero. Seke tayê hetî vanê do tu çîyêk sey verî nêbo, no rast o. Bêguman weçînitişê 7’ê Hezîrane de zî bin kewtîbî. Halo nikayên maneno weçînitişê 7’ê Hezîrane. AKP’yî 7’ê Hezîrane ra dima dişmenanê Kurdan dir tîfaq viraşt. 

 Awankerdişê AKP’yî de û polîtîkayanê ci yê dimayênan de tayê çîyî vurîyayî. Çunke vejîya werte ke tu karaktere aye yo azadîwaz çino û hemverê mucadeleyê azadîya Kurdan de zî bin kewta. Beno ke biwazê ramojnê ke vurîyayê tayê polîtîkayanê xo bivurnê. Vatişê îqtîdarî yê ‘ma nêeşkayî xo bide famkerdene’ yeno manaya politikaya ma rast a la ma nêeşkayî xo bidê famkerdene. La eslê xo de şarî polîtîkayê AKP’yî rind fam kerdî, verê xo da rayîrêkê bînî.  

‘Netîceyê Weçînitişê Cayîyî de Rolo HDP’yî Zaf Muhîm o’

Bayikî ard ziwan ke netîceyê weçînitişanê cayîyan de rolê alternatîfê HDP’yî zaf muhîm o û vat, “Kurdî eke tena bi mucadeleyê xo tê bigêrayêne, bêguman do mucadeleyê demokrasîyî bikerdêne xurt, labelê do netîceyo nikayên nêvejîyayêne werte. No afernayîşê têgêrayîşêkê sîyasî yê hemparî yo. Eke alternatîfêk sey HDP’yî nêvejîyayêne werte no netîce nêvejîyayêne werte. Naye ra proje, zihnîyet û tîfaqê HDP’yî netîceyê weçînitişî de bewlîkerdox o.

Bêguman leteyo tewr muhîm ê HDP’yî zî Kurd ê, hêzê demokratîkî yê Kurdan ê. Eke ma vajê no tena serkewtişê Kurdan o, do şaş bo. La eke Kurdan hêzanê demokrasîyî yê Tirkîya dir pîya tê nêgêrayêne no netîce zî nêvejîyayêne werte. Ganî merdim na rastî bivîno û ser o bifikirîyo.”

‘Sînerjîya ke HDP’yî dir Vejîyaye Werte Netîceyêk Hêzê Xo Zêdeyêrî Aferna’

Bayikî vat, “Weçînitişê Stenbolî de eke Kurdan û hêzanê demokrasîyî binê sîwanê HDP’yî de paştî nêdayêne mumkun nêbi ke faşîzmê AKP-MHP’yî Stenbol de û bajaranê pîlan ê bînan de zihîf bibê. Nê weçînitişî de sînerjîyêk vejîyaye werte. Yewbînan pêgirewtişê hêzanê demokrasîyî û hêzanê demokratîkan ê Kurdan sînerjîyêk hêzê x ora zêdeyêr vete werte. Ganî bêro diyene gama ke mucadeleyê azadîye û demokrasîyî de sînerjîyêk bêro afernayene netîceyêko senî pîl vejêno werte.”

‘Tîfaqê AKP-MHP’yî do Rew Rew Netîceyê Weçînitişî Hezm Nêkero’

Bayikî bale ante sere nizdbîyayîşê tîfaqê AKP-MHP‘yî yê vera netîceyanê weçînitişî û vat, “Şaş o ke kes vajo do AKP-MHP netîceyanê weçînitişî hezm bikero. Vatişê ‘demokrasî bi ser kewt, îradeyê şarî bica ame’ demagojî yo. Seba ke tesîrê binkewtişê xo qij kerê û rayapêroyîye ya dinya bixapênê wina vanê. Îqtîdarî heta vizêr zî seba weçînitişê Stenbolî vatêne weçînitişê mendiş û nêmendişî yo. Mesela weçînitişê 7’ê Hezîrane de îradeyê şarî vejîyabi werte, îqtîdarê AKP’yî bin kewtibi. Tirem înan ê wextî zî vat ‘îradeyê şarî bica ame, şar hetgêrê demokrasî yo?’ Ganî na yewe bêro diyene. Xusûsen Tayyîp Erdogan şexsîyetêko bikompleks o. Ganî merdim ê ra nêpawo ke îradeyê şarî nas bikero. Çunke ê dir kompleksê hakimbîyayîşî esto. Naye ra xusûsen do hemverê şarê Kurdî û hêzanê demokrasîyî de ke o vist nê halî fen û kayan biçarno, provokasyon û komployan bikero. Do bieşko polîtîkayanê xo yê şerî bidomno.

Şexsîyetê Erdoganî û îqtîdarê AKP’yî qesasgirewtox ê. Ganî merdim bivîno ke ê do senî qesas bigêrê. Yeno zanayene ke seba vatişê ‘Ma do to nêkerê serek’ senî nizdê Selahattînî bîyî. Naye ra ewro zî hêrişê kesê sey Osman Kavalayî keno, hêrişê Can Dundarî keno. Kesê ke muxalif ê, kesê ke vernîya îqtîdarê ê gênê înan ra qesas gêno. Ganî na rastî bêro diyene. Hetêna ra hêrişê Başûrê Kurdistanî keno. Rojakewtena Firatî ser o gefan waneno. Naye ra zî ganî şaro Kurd û hêzê demokrasîyî tedbîr bigêrê, hîna zaf haya înan xo ra bibo, nekewê mîyanê nizdbîyayîşanê şaşan. Ganî bizanê ke AKP wazeno qesas bigêro.”

‘Îqtîdar Hendî Îradeyê Tirkîya Temsîl Nêkeno’

Bayikî dewamê qiseykerdişê xo de vat, “Îqtîdarê AKP’yî vatêne eke ma Stenbol de vînî bikerê ma do Tirkîya de vînî bikerê. Gerek nêkeno ke Tayyîp Erdogan zî na yewe vajo. Kamo ke şîyayîşê sîyasî, cimatkî, îqtîsadî û kulturî yê Tirkîya teqîb keno do bizano ke bajarê bewlîkerdoxî bajarê sey Stenbol, Enqere, Îzmîr, Edene, Mersîn, Antalya, Hatay, Eskîşehîr, Dîlok û Bûrsa yê. Bajarê ke şîyayîşê Tirkîya bewlî kenê Yozgat, Çankiri, Nîgde, Afyon yan zî Sînop nêyê. Bajarê sey Stenbolî yê pîlî ameyoxê Tirkîya bewlî kenê. Naye ra nê bajaranê pîlan de binkewtiş yeno manaya hemeyê Tirkîya de binkewtişî. Îqtîdaro ke temsîlîyetê xo nê bajaran de keno vînî pêroyê Tirkîya de temsîlîyetê xo keno vînî.

Eke Tirkîya welatêko demokratîk bibîyêne do halêkê winayênî de ke hende bajarê pîlî dest ra şîyî do weçînitişêko pêroyî biameyêne kerdene. Eke welatêko demokratik bibîyêne do îqtîdarî bivatêne îradeyê şarî bica ameyo, loma ma fek îqtîdarî ra vera danê. Labelê seba ke Tirkîya de zihnîyet û fehmêko demokratîk çino, xusûsen yê ke benê îqtîdar heme îmkananê dewlete seba rantê xo û hetgêranê xo şuxulnenê, bi asanî fek îqtîdarî ra vera nêdanê.”

‘Netîceyê ke Vejîyayê Werte Destpêkê Prosesêkê Sîyasîyî yê Neweyî yê’

Bayikî bale ante ke îqtîdaro nikayên bi nê terzî hendî nêeşkeno îdare rayra bero û vat, “Îqtîdarê AKP’yî hendî bîyo îqtîdarêko demkî. Ganî merdim bi çimêkê demkîyî biewnîro nê îqtîdarê AKP’yî ra. Ganî bêro dîyene îqtîdar bin ê hawayî nêeşkeno xo bido dewamkerdene, hêzê demokrasîyî zî xo goreyê nê amade bikerê. Ganî hêzê demokrasîyî tîfaqê xo hîna bikerê hîra û wext ameyo ke hendî ê îdareyê Tirkîya bigêrê xo dest. Eke nê hêzî tîfaqê xo hîna hîra kere, bi projeyanê xo waştişê demokratîkbîyayîşê Tirkîya eşkera bikerê no hal do vernîya demokratîkbîyayîşê Tirkîya hîna zaf akero. Do bikero ke îdareyêko demokratîk vejîyo werte.

Hendî tu çî sey verî nêbeno. Beno ke îqtîdarê AKP-MHP’yî biwazo îqtîdarê xo sey verî bidomno, beno ke nê ferz kero, beno ke polîtîkaya xo ya şerî de israr bikero. Labelê şertê xomîyanênî û teberî yê sîyasîyî do vernîya dewamkerdişê polîtîkayanê verî de bibê asteng. Ma eşkenê bi asanî vajê ke netîceyê weçînitişî do her kesî biheyecan bikero, do şar fam bikero ke gama ke mucadele bibo do bieşko bi ser bikewo. Do na çarçewa de mucadeleyo cimatkî hîna xurt bibo.“