Hemserekê Konseya Caardişî ya KCKyî Cemîl Bayik bi meymanê bernameyê taybetî yê Stêrk TVyî û cewab da persanê rojnameger Ciwan Tunçî.

Babetê ke Cemil Bayikî erjnayî wina yê:

"Rastîyêke esta û a zî kifş a. Na rastîye çi ya? Mesela kurdan ê Vakurî. Heta ke Vakurê Kurdîstanî mesele çareser nêkero parçeyê bînî zî çare nêkenê. Babeta girînge na ya ke ganî kurdî yewîya neteweyî seba xo sey esas bigêrê. Eke yewîya neteweyî sey esas nêgêrê mesele çare nêbena. Nika Rojhelatê Mîyanênî de şero hîrêyîn ê dinya esto. Eke kurdî wazenê netîce bivurnê ganî yewîya neteweyî yê xo awan bikê.

Seba Başûrî zî wazena çîyêk vaja. Şarê ma yê Başûrî seba Rojawanî rolêkê pîl gênê xo milî. Ez selam kena înan. Ciwanê Başûrî şinê tewrê xoverdayîşê Rojawanî benê, şehîd benê. Şarê ma yê Başûrî dest pê kampanyaya boykotî yê malanê tirkan kerd û waşt ke kongreya kurdan kom biba. La ganî şarê Başûrî hîna xurtêr vengê xo vejo. Babeta yewîya neteweyî de ganî bi rolêkê pîlêr wurzo payan ser. Başûrî de mesela bingeyîne partîyê sîyasî ya. Ge ge beyanatanê başan kenê la ge ge zî dore dewletanê mîyanneteweyan beyanatan danê. Yanî Başûr hema bi temamî xo nêxelisna. Ganî xo bi temamî bixelisno. Kongreya Neteweyî nê esasan ser o eşkena kom biba. Nika wext wextê ney o.

Ganî ma kêmasîyan zî bivejê meydan. Kêmasîyî çî yê? Wayîrvejîyayîş têna seba Rojawanî yo. La ganî sena Vakurî zî nê çîyî bêrê kerdene. Dewleta Tirkan sîyaseto ke Rojawa de kena Vakurî de zî kena. Vakurî de sîyasetmedaran tepişnena, dest nana şaredarîyan ser, bi se hezaran merdiman erzena zîndanan nêverdana ke çew sîyaset biko. Bi nê hawayî wazena kurdan qir bika. Hayîya her kesî zî pê nê çîyan esta. Dewleta Tirkan a faşîste û îşxalkere seba ke kurdan qir bika Vakur xo rê sey esasî gêna. Eke merdim seba kerdişanê Dewleta Tirkan ê vera Rojawanî wurzo payan ser la seba kerdişanê aye yê vera Vakurî bêveng bimano têna xo xepineno. Têna pê wayîrvejîyayîşê Rojawanî, têna seba Rojawanî pê serewedaritişê vera Dewleta Tirkan nêbeno. Bi nê hawayî na mesele, mesela kurdan çareser nêbena.