Gerîlaya ARGKyî Zîlane (Zeynepe Kinaci) 30ê hezirana 1996 de Dêrsim de çalakîya fedayîye kerde. Na çalakîya fedayîye tarîxê şarê kurdî û têkoşînê PKKyî de rolêko muhîm kay kerd. Gerîlayê HPGyî Ciwan Çîyareş û gerîlaya YJA Starî Jinda Amara derheqê çalakîya Zîlane de ANFyî rê qisey kerd.

Gerîlayê HPGyî Ciwan Çîyareşî nê vatî: ''Çalakîya fedayîye ya şehîde Zîlane semedê ma gerîlayan zaf muhîm a. O wextî de hetê taktîkî ra proseso newe da destpêkerdene. Ewro hema tesîrê na çalakîye dewam keno. Ma sey gerîlayanê azadîye na çalakîye xeta têkoşînê xo rê esas genê. Îşxalkerî bi paştdayîşê NATOyî bi çekanê qedexeyan hêriş kenê la gerîlayî zî vera nê hêrişan tedbîrê pawitişî xurt kerdî. Şarê kurdî hinî zano ke wayîrê hêzî yo û eşkeno vera hêrişî têkoşîn bikero.  Xeyrê xeta têkoşînî ya ke Zîlane û bi hezaran şehîdan afirnaye, şarê kurdî hêvî keno û paştê ci tira pêt a.''

Gerîlaya YJA Starî Jinda Amara zî wina qisey kerd:  ''Çalakîya embaze Zîlane hem hetê leşkerî hem zî hetê taktîkî ra morê xo da binê tarîxî ro.  Vera cehdkerdişê suîkastê vera Rayberîye çalakîya fedayîye kerde. Rayberîye bi  vatişê 'Zîlane fermandara min a' ard ziwan ke aye senî wextê ci de çalakîya raşte kerda. Ewro bi hezaran embazê ma xeta Zîlane de rayra şinê û çalakîye kenê. Embaze Sara û Rukene, embaz Rojhat û Erdal fedayîyê nê rayîrî, na xete yê. Nê hemrayê ma teqîpkarê embaze Zîlane yê. Ma zî nê hemrayanê xo teqîp kenê. Ma do sey gerîlayanê YJA Starî do  heta peynî xeta fedayîye de rayra şirê.''