Bircê Amedî yê ke 5 hezar serran ra verê ameyê viraştene û dima hetê medenîyetanê cîyayan ra ameyê newekerdene, hema zî payan ser o yê. Bedenê Amedî tarîxê şaristanî rê şahîdîye kenê.

Tarîxê  destpêkî yê bircanê Amedî nêno zanayene labelê goreyê tayê zanayîşan vanê Îsayî ra pey serra 349 de heta împaratorîya Roma ra ameyê newekerdene û viraştene, şeklê ci yo nikayên zî hetê împarator Justinianusî ra ame viraştene. Bircê Amedî Îsayî ra ver serra 3000 de hetê Hurîyan ra ameyî viraştene. 4 berê bingeyênî yê bircânê Amedî estê ke nameyê nînan Berê Koyî, Berê Riha, Berê Mêrdînî û Bero Newe yo û serê bircanê Amedî de zî 82 bircî estî. Berzîya dêsanê ci 12 metre, verênîya ci 12 metre û dergîya ci zî 15 kîlometre ya. Bircê ke heta nika girîngîya xo vîndî nêkerda, nê yê: "Bircê Kênekan, Bircê Hewt Birayan û Bircê Ben û Senî." Yenê hesibîyayene ke Bircê Amedî mabênê 350 serran de ameyî viraştene û heta roja ma ya ewroyêne payan ser  o mendî.

Bircê Amedî  serra 2015 de wextê îdareyê xoserî de bîy hedefê Artêşa Tirkîya û hetê hêzanê Tirkan ra  guleyî ameyî panayene. Hêzanê dewlete hetê bircan ê Hz. Suleymanî bi makîneyan xirab kerdî. Her serre zaf turîstî û tarîxnasî Bircanê Amedî  zîyaret kenê. Bircanê Amedî heta nika zaf weşî û xirabî dîyî.  Bircê Amedî zî sey şarê Amedî rêçanê zaf serebûtan zerrîya xo de nimnenê.