Hemsereka Pêroyî ya HDPyî Pervîne Buldan bi wesîleya Roşanê Qurbanan qezayanê Qelqelî û Seravê yê Wanî de şar zîyaret kerd û roşanê înan pers kerd. Buldane zîyaretanê xo de rojdem ercna û vat ke ê do xetêka têkoşînî ya newîye awan bikerê. Buldane seba paştdayîşê înan ê bi Partîya Çep a Keske şarî rê sipas kerd. 

Buldane da zanayene ke weçînayîşî her warî de seba her kesî prosesêko girîng o û vat: ''Ma hedefêko pîl na xo ver la ma faşîzm û tedayanê AKP-MHPyî ra ser nêkewtî. Ma xeletî û kêmasîyî zî kerdî la ma do nînan ser de vinderê û raşt bikerê. Ma do rixmê pêro neheqî û bêhuqûqîyan zî xeta têkoşîno ke şar wazeno awan bikerê. Ma do bi kongreya xo ya newîye xetêka têkoşînî ya newîye bidê xo verî. 

Nika verê ma de weçînayîşê herêmî est ê ke seba ma zaf girîng ê. Ma do goreyê waştişanê şarê xo namzetan vejê û nînan bikerê hemşaredaranê xo. Şima kamî/e biwazê ma do ey/aye bikerê namzetî/e.

Polîtîkayê tecrîdî rojdem de yê û tecrîdê vera Birêz Ocalanî hema zî dewam keno. Embazê ma yê sîyasetmedarî hema zî zîndanan de yê. Qeyûmî tayînê şaredarîyanê ma ameyî kerdene. Vera nê pêroyîyan ganî ma zemînê pîlkerdişê têkoşînî awan bikerê. Qetî ma do ser bikewê.''

Buldane dima qezaya Seravê zî zîyaret kerd û beşdara bernameyê roşanî bîye.