Wekîlê HDPyî yê Çewlîgî Erdal Aydemîrî eşkera kerd ke butçeya rayîrê Gêxî seba qezayêka bîne şuxulîyaye ke Gêxî de zafêr elewîyî ciwîyenê û mesele berde Meclîs. Aydemîrî persa ke çira dewanê elewîyan rê xizmet nêno kerdene.
Wekîlê HDPyî yê Çewlîgî Erdal Aydemîrî da zanayene ke butçeya rayîrê Gêxî seba qezayêka bîne şuxulîyaye û bi vernîyazêkê persî mesele berde Meclîs. Aydemîrî waşt ke Wezîrê Resa û Binawanîye Adîl Karaîsmaîloglu cewab bido persanê ci.
Aydemîrî vat: ''Rayîrê Gêxî-dewa Bîlîce 11 dewan besteno pa. Seba ke rayîr nêvirazîyeno xeylêk meseleyî qewimîyenê. Seke zanîyeno ke nê dewan de elewîyî ciwîyenê. Verê cû zî warê bînî yê elewîyan Karer de rayîrî nêameybî viraştene. Gêxî de zî heman çi beno. Serra 2017î de butçeya ke seba rayîrê Gêxî amebî peydakerdene seba qezayêka bîne şuxilîyaye. Na mesele hemwelatîyê Gêxî zî zaf qehirnayî. Qeymeqamê Gêxî derheqê babete de soz dabi hemwelatîyanê Gêxî la sozê xo nêard ca.
Reyna ganî cade rayîrê Gêxî-Çewlîg, Gêxî-Azarpêrt û Gêxî-Depe bêrê newekerdene û rayîrê Gêxî-Çêrme bêro temamkerdene. ''
Erdal Aydemîrî Wezîr Karaîsmaîlogluyî ra nê çîyî persayî:
-Wezaret derheqê nê rayîran de xebatêke keno_
-Dewanê elewîyan de dewlete xizmetê mecbûrî nêkerdî. No tesaduf o?
-Zanîyeno ke kêmasîyanê nê rayîran ra tim qezayî qewimîyenê û hemwelatîyî mirenê. Seba safîkerdişê nê kêmasîya şima do xebatêke bikerê?
