Wekîlê HDPyî yê Çewlîgî Erdal Aydemîrî Çewlîg de tay zîyaretî kerdbî. Aydemîrî zîyaretanê xo ra dima  derheqê meseleyanê esnaf, citkar û mexdûranê erdlerzî de eşkerayîyêke daye. Aydemîrî da zanayene ke wayîrê firinan pê vaykerdişê nanî qayîl nîyê û esnafî wazenê ke masrafê înan hetê dewlete ra bêrê dayene.

 Aydemîrî pare kerd ke heqê hemwelatîyan ê astengdaran yenê binpaykerdene û heqê înan ê resê bêpereyî ame wedaritene. 

Aydemîrî bale ante awanîya xirabe ya şaristanî ser û ard ziwan ke şaristan de pêro îhaleyê awanîye dîyenê muteahîtanê AKPyî. Aydemîrî îfade kerd ke Mudirîya Perwerdeyî de bêusûlîye yena kerdene. 

Aydemîrî eşkerayîya xo de dewanê elewîyan ser o vindert û da eşnawitene ke cîyakerî yena kerdene û dewanê elewîyan de xizmet nêno kerdene. 

Aydemîrî derheqê mexdûranê erdlerzî de wina vat: ''Erdlerzê Kanîreş-Çêrme yê 14ê hezîrane ra nata hema zî meseleyê keyeyan dewam kenê. Dewan û merkezê nê qezayan de ban û axurê hemwelatîyan texrîb bîyî. Zimistan de hemwelatîyî do meseleyanê pîlan reyde têrî bimanê.''

Eşkerayîye de ame parekerdene ke nêweşxaneyanê Çewlîgî de testê Korona qîm nêkenê, nêweşxaneyî pakî nîyê û nêweşî binê germî de xeyman de terkê mergî bîyî. Aydemîrî waşt ke cade pêro meseleyê weşîye bêrê çareserkerdene.