Wendekara Zanîngehê Munzurî Gulîstane Doku 5ê çeleyê 2020î ra nata vînîbîyaye ya. Keyeyê Doku ya ke tira xebere nîna girewtene verê Edlîyeya Dêrsimî de dest pê çalakîya roniştişî kerd.Dayîke Bedrîye Doku û Endama Komîsyonê Semedê Doku Edalet Dîlane Ergul derheqê babete de ANFyî rê qisey kerd.

Dayîke Dokuya ke bi lawikan vera bêedaletîye hersê xo ard ziwan nê vatî. ''Di serrî yo kênaya mi vînîbîyaye ya. Di serrî yo ez vana kênaya mi ha ça? Bero ke ma nêcina nêmend. Sozî dîyayî la ma netîce nêgirewt. Çi ameyo sereyê Gulîstana mi Abarokov zano. Kiştox di serrî yo teber de gêreno. O wina rehet gêreno la esteyê kênaya mi zî çîn ê. Şima çi se kerd Gulîstana mi? Bermayîşî ra çimê mi bîyî ziwa. 20 serrî ravêrî zî ez do bipersê, vajê Gulîstane ha ça?''

Dîlane Ergul zî ard ziwan vergumanî hetê dewlete ra yenê pawitene û vat: ''Roja verêne ra nizdîbîyayîşo raşt nêame ramojnayene. Cigêrayîşo bitesîr nêame kerdene. Abarakox û keyeyê ci nêameyî cipersayene.Tewr peynî de Zaynalî Gulîstane dîye la seba ke babîyê ci polîs o naye ser o nêame vindetene. Çew vano qey yew cinîye nê çî-mî bîyo  vîn. Ma do cigêrayîşê Gulîstane Doku rê dewam bikerê.''