Gerîlaya YJA-Starî Mercane Erkol (Bêrîtane Tolhildan) 16ê teşrîna verêne ya 2017î de qezaya Pasûrî ya Amedî de şehîd bibî. Cenazaya Mercane 3 serrî yo nêdîyena keyeyê ci.

MEBYA-DERî seba ke cenaza keyeyê Erkolî rê bêra teslîmkerdene Goristanê Asrî yê qezaya Rezanî yê Amedî de eşkerayîyêke kerde.

Hemserekê MEBYA-DERÎ Şeyhmus Karadagî eşkerayîye de qisey kerd û vat: ''Tira yew parçe zî bimano keyeyî wazenê cenazayanê xo bigêrê.'' Karadagî da zanayene ke keyeyê Erkolî televîzyonî ra şehadetê kênaya xo musa û seba ke cenaza bigêro muracatê Serdozgerîya Komare ya Amedî kerd.

Keyeyî dima zî bi tesdîqê Fermandarîya Cendirmeyan Nêweşxaneyê Zanîngehê Dîcle de seba testê DNA numûneya gonîye daye.

Keyeyî ra babîyê Mercane  temmuza 2019î de vengdayîşê cendirmeyan ser o şi Goristanê Yenîkoyî la dî ke heman gorî de 3 cenazayê parçekerdeyî estê. Serdozgerîye keyeyî rê vat ke dima ke cenaza bêrê cîyakerdene yê Mercane bidîya înan. La cenaza hema zî keyeyî rê nêameye teslîmkerdene.

Karadagî da zanayene ke keyeyê Erkolî Wan de ciwîyeno û seba cenaza çend caran ame Amedî. Karadagî vat: ''Teslîmê cenazayan bîyo îşkenceyê sîstematîkî. Bi nê hawayî erjê merdimîye yenê bipaykerdene. Definkerdişê cenazaya xo heqêko tabî yo.''