8-17ê kanûna 2017î de taca Oleka Jore ya Bedlîsî de Goristanê Garzanî amebi rijnayene û tira 282 cenazaya ameybî vetene. 2018 de eşkera bi ke cenazayî Dezgehê Tipê Edlîyî yê Îstanbulî de yê. Cenazayî dima goristanê bêkesan ê Kîlyosî de kişta rayîrî û mîyanê kutuyan ê plastîkan de ameyî definkerdene. Keyeyan seba ke cenazayanê xo bigêrê numûneyê gonîye dayî la 3 serran ra nata xeylêk keyeyî nêeşkayî cenazayanê xo bigêrê.

Heta nika 21 cenazayî dîyayî û 261 cenazayê bînî nêdîyayî keyeyanê înan. Cenazayê ke kişta rayîrî de defin bîyî pê kutuyanê plastîkan dîyenê keyeyan. Komeleya Huqûqnasan ê Seba Azadîye (OHD) semedê 'îşkence û ezîyet' û 'pê vîrameyîşê merdiman heqaret' gerreyê mesele kerd.

Huseyîn Tekîn serra 1991î de tewrê PKKyî bibi. Babîyê ci Şeyhmus Tekînî seba ke bizano lajê ci merdo yan nê numuneyê DNA da la hema netîce eşkera nêbi. 

Babî Şeyhmus Tekînî vat: ''Ma 3 serrî verî şîyî Bedlîs numuneyê gonîye da. La Goristanê Garzanî rijîya.  Dima înan cenazayî tîya de mîyanê kutuyan de kişta rayîrî de defin kerdî. Dinya de çîyo bîn o winasên çin o. Xora kişîyayê hînî çira cenazayanê ma nêdanê? Ganî cenazayan rê wina nêro kerdene. Heta ke ê cenazayî uca de bibê ma do têkoşînê xo ra fek vera nêdê. Wa ê zî nê zulmî nêkerê. Hînî bes o. Ganî cenazayî bidîyê.''