Gerîlayê HPG'yî Mûrat Çakmako (Destîyar Veroz) ke bejikê merkezê Dêrsimî de 19’ê Hezîrane de netîceyê bombardûmanî de cuya xo vînî kerdebî, vizêr saetanê şanî de cenazeya ê Meletî de goristanê bêkesan ra hetê keyeyê ci ra amî girewtene û amî berdene bi Dêrsim.

Xeylî Kesî Tewrê Merasîmî Bîyî

Keyeyê Çakmakî, ard ziwan ke cemxaneyo ke Dêrsim de yo bawerîya Elewîyan temsîl nêkeno, vernîya keyeyê xo yo ke mewqîyê Kemerbelê Merkezî de yo merasîmê cenaze viraşt. Endamê keyeyê, hemserekê HDP’yî yê bajarî û xeylî hemwelatijî tewrê merasîmî bîyî. Cenazeya Çakmakî, goristano ke nizdê mewqîyê Kemerbelî de yo bi çepikan amî definkerdene.

Xebere Nêdîyaye Bi Keyeyî

Dosyaya dozgerîye de rixmo ke ame zanayene cenaze aîdê Mûrat Çakmakî ya zî xebere nêdîyaya bi keyeyî û cenaze goristanê bêkesan de amîya definkerdene. Keyeyî, netîceyê cehdanê pîlan de tespît kerdo ke cenazeya Çakmakî goristanê bêkesan de amîya definkerdene.