Cenazeya Muhammed Ozcanî (18) yo ke 20’ê Hezîrane de seba asnawkerdişî nizdê Pirdê Kabê yê qezaya Sûrî ya Amedî de kewtibi Royê Dîcle û awe de şibi, amî dîyene.

Roja 4’ine ya xelesnayîşî de ke Grûbê Cigêrayîş û Xelesnayîşî yê Daîreya Îtfaîye ya Şaredarîya Bajarê Girdî ya Amedî zî tede ca gênê qeraxê Royê Dîcle de cenaze amî dîyene. Cenazeya Ozcanî cayo ke kewtibi royî ra 2 kîlometreyî dûrî ameye dîyene, cenaze seba kerdişê otopsî amî berdene bi Nêweşxaneyê Dewlete yê Selahattîn Eyyûbîyî. Cigêrayîşo ke derheqê qewimîyayîşî de ameyo destpêkerdene dewam keno.