Grûbêka cinîyan ê Başûrê Kurdistanî şîyî serdana Mertalanê Ganeyan ke Binarê Qendîlî de çalakîye virazenê. Cinîyan çalakîya înan pîroz kerde û hemverê îşxalkarîya dewleta Tirkî ya Başûrê Kurdistanî de razînêbîyayîşê xo ard ziwan.
Seba şermezarkerdişê îşxalkarîya dewleta Tirkî ya Başûrê Kurdistanî grûbêka cinîyan ê Başûrijan şîyî serdana Mertalanê Ganeyan û çalakîya înan pîroz kerde.
Cinîyan ra êyê ke şîyî serdana çalakgeran maya bi nameyê Esmer Resûle seba paştîdayîşê ciwanan vat, „Ma bi nameyê cinîyan ê Başûrî mertalanê ganeyan pîroz kenê û ma hemverê îşxalkarîya dewleta Tirkî de paştî danê înan.“
Esmer Resûle derheqê îşxalkarîya Başûrî de vat: Îşxalkarî wazenê ziwan, erd û şarê ma îşxal bikerê û çinê bikerê. Vengdayîşê mi seba cinîyan ê Başûrê Kurdistanî yo ke wa paştî bidê ciwananê ma û hemverê îşxalî de vejîyê. Wa dişmen zî rind bizano ke ma welatê xo çi rey ca nêverdanê, heta Kurdêk bimano ma do xover bidê.
Hemverê bêvengîya hukmatê Başûr û Iraqî de zî maye Esmere razînêbîyayîşê xo wina ard ziwan: Ma bêvengîya hukmatê Başûrê Kurdistanî û Iraqî şermezar kenê û qebûl nêkenê.
Amed Denîzo ke ciwanan ê çalakîya mertalanê ganeyan ra yew o mayî pêşwazî kerdî û vat, „Hemverê sîyasetê leyminî de ma, ciwanê welatperwerî, heta yew çete yan yew îşxalkar welatê ma de bimano ma do mucadele bikerê. Ma soz danê şehîdanê xo ke ma do şer bikerê û nêverdê ke îşxalkarî ravêrê erdanê ma.“
Dimayê serdane ra cinîyan ê Başûrijan verê xo da cayê qirkerdişê Kortekî û bi nameyê REJAK’î eşkerayî daye. Eşkerayîye de ame vatene, „Bi ruhê şehîd Zîlane ma do îşxalkarîye birijnê. 27’ê Hezîrane de îşxalkarîya dewleta Tirkî bi hêrişê hewayîyî Kortek de qirkerdişêk kerd û netîce de 3 hemwelatijê bi nameyê Ebdulah Alimîne, Kurdistan Ebdulah, Heryet Ebdulah şehîd bîyî û 4 hemwelatijî zî birîndar bîyî. Hemverê nê qirkerdişî de bêvengîya hukmatê Başûrî û Iraqî yeno manaya paştîdayîşê îşxalbîyayîşê Başûrî.
Bi nameyê têgêrayîşê REJAK’î ma hemverê îşxalkarîye de çalakîya xo domnenê û veng danê her kesî ke bêvengîya xo ya hemverê îşxalkarîye bişiknê. Ma veng danê heme cinîyan ke hemverê îşxalkarîye de vejîyê û ma bi yew vengî veng danê û vanê ‚Îşxalkarîye rê nê, pêşkarbîyayîşê bi doman û cinîyan rê nê, teslîmîyet û xayînîye rê nê.‘“
Eşkerayî bi slogananê „Cinî Cuye Azadî“ û „Şehîdî nêmirenê“ qedîyaye.
