Ciwanê HDP’yijî ewro Amed de şayîyêk virazenê

Meclîsê Ciwanan ê HDP’yî do bi slogana “Mebe muptela, azad bibe” ewro şayîyêk organîze bikero û seba tewrbîyayîşî vengdayîş kerd.  

Meclîsê Ciwanan û Meclîsê Cinîyê Ciwanî yê HDP’yî ewro do bi slogana “Mebe muptela, azad bibe” şayîyêk virazo. Şayî saete 18.00 de Parkê Sumerî yê qezaya Yenîşehîrî ya Amedî de do bêro viraştene. Şayîye de Koma Pel, hunermend Alî Aslan û Koma Dengê Amara vejîyo sehne.

 Parlamentera HDP’yî ya ciwane Dersîm Dage seba tewrbîyayîşê şayîye veng da û vat: “Ma 11’ê Hezîrane de hemverê polîtîkayanê serê ciwanan ê Kurdan hemleyêk daye destpêkerdene. Ma wazenê bi na hemle polîtîkayanê asîmîlasyon û dejenerebîyayîşî vindarnê û mucadele bikerê. Na çarçewa de ma veng danê ciwanan ke tewrê şayîye bibê.”

'Dewlete Nêwazena Ciwanî Hişmend Bibê‘

Endamê Meclîsê Ciwanan ê HDP’yî Omer Armaçî zî wina vat: “Ma wazenê bi nê çalakî û şayîyan şarî hemverê tîryak, dejenerebîyayîş û fihûşî de hayîdar bikerê û hişmend bikerê. Ma hemverê nê polîtîkayan de xebate kenê la dewlete xebata ma asteng kena. Ma zî hemverê nê de hemle daye destpêkerdene, la dewlete tehemul nêkena û mudaxeleyê xebata ma kena. Dewlete nêwazena ciwanî hişmend bibê. Ê wazenê ke ciwanan bi temamî cimat û hişmendîye ra dûrî bidê.”

 Endama Meclîsê Cinîyan ê Ciwanan ê HDP’yî Nurgul Încî zî vengdayîşê mucadeleyî yê hemverê tîryakî, fihûşî û dejenerebîyayîşî kerd û waşt ciwanî xo bi hişmend bikerê.

 Endamê Meclîsê Ciwanan ê HDP’yî Mûhammed Erkîzî zî seba tewrbîyayîşê şayîye veng da ciwanan.