Qezaya Cîzîre ya Şirnexî ya ka şaredarîya ci hetê îqtîdarî ra ameye xespkerdene de çalakîyê verba qeyûmî dewam kenê. Ewro reyna şarê Cizîrî îşxalkarîya qeyûmî şermezar kerde.

Wekîlê HDP'yî yê Şirnexî Nuran Îmîre, Hasan Ozguneş û Huseyîn Kaçmaz û hemşaredar Mehmet Zîrîg û Bêrîvan Kutlu zî tede zafê kesî Xaçere de ameyî pêser. HDP'yî kuçeyê Orhan Doganî de yew bi yew zîyaretê esnafan kerd û derheqê qeyûmî de zanayîşî dayî şar. Wextê zîyaretî de sloganê "Cizîr ê ma yo", "Bicîwîyo xoverdayîşê şarî" ameyî vatene. Roniştoxê şaristanî zî bi çepikan paşt da sloganan û qeyûm şermezar kerd.

Îmîre qiseykerdişê xo de vat ê bi roniştoxê şaristanî qayîl û serfîraz ê, her hewte zî sindoqî bêrê dayene şar reyna zî îradeyê  xo rê do wayîr bivejîyo. Îmîre vat: "Qeyûm yeno meneya nasnêkerdişê îradeyê şarî."

Ozguneşî zî vat: "Qeyûm bêhuqûqî yo, talan û dizdî yo. AKP û MHP bi tedayan nêeşkenê xo xelas bikê. Êyê ke zulm kenî tarîxî de vîndî benê. Ma do bi têkoşînê xo biratîya şaran û cuyêka rûmetêne saz bikê."