Polîsan hêrişê partîyîjan û hemwelatîyanê kerd ke seba ke Cizîrî ser o tayînkerdişê qeyûmî protesto bikê ameyî pêse. Hêriş de Parlamentere Nuran Îmîre sereyê xo ra birîndar bîye. Çalakîye de slogana 'Bi xoverdayîşî ma do ser bikewê' ameye vatene.
Hemşaredarê Şaredarîya Cizîrî Mehmet Zîrîg wezîfe ra ame girewtene û herinda ci de qeyûm ame tayînkerdene. Serê sibayî rayîrê ke şinê bînaya HDP'yî , hetê polîsan ra bi wesayîtanê bizirxan ameyî girewtene û cayanê bînan ê şaristanî de wesayîtê bizirxî ameyî cakerdene.
Wekîlê Şirnexî Nuran Îmîre û Hasan Ozguneş, hemserekê şaredarîye yê ke herinda înan de qeyûm ame wezîfedarkerdene zî tede zafê kesî verê bînaya HDP'yî ya Cizîrî de ameyî pêser. Endamanê partîye waşt verê bîna de beyanat bidê. La polîsan semedê qerarê qedexekerdişî yê walîtîye ra destûr nêda ke beyanat bêro wendene. Dormeyê girseyo ke waşt rayîr şoro hetê polîsan ra ame girewtene. Heman wextî de mabênê polîsan û endamanê partîye de munaqeşa vejîya û endamê Meclîsê Şaredarîye yê HDP'yî Mesut Uçkaç û Serhat Kuçuk zî tede 4 kesî ameyî destbendkerdene. Polîsanê hêzanê çewîkî pê copan hêriş kerd. Hêriş de Nuran Îmîre sereyê xo ra derbeyêk girewte û ameye berdene bi Nêweşxaneyê Dewlete. Dimayê hêrişî hemwelatî dekewtî bînaya HDP'yî.
Pêkewtişê mabênê girseyî û polîsan de verê berê bîna de zî bi slogana 'Ma do bi xoverdayîşî ser bikewê' çalakî dewam kerd. Girseyî bi xortuman awe rijnaye polîsan ser û polîsan zî bombaya gazî eşte zere. Dima ke bombaya gazî hetê girseyî ra apey amey eştene, polîsan xo tepîya ant.
