Qezaya Cizîre ya Şirnexî de wextê qedexeyê tebervejîyayîşî yê 14ê kanûna 2015î de taxa Cûdîyî de bodrumanê 3 bînayan de 177 kesî hetê dewleta tirke ra ameybî qetilkerdene. Seba 177 kesan Cizîre de aktîvîteya yadkerdişî ameye kerdene.

Aktîvîte Rêxistina HDPyî ya Cizîre de ameye kerdene. Aktîvîstê Têgêrayîşê Cinîyan ê Azadan (TJA), Wekîlê HDPyî yê Şirnexî Nurane Îmîr, Huseyîn Kaçmaz û Hasan Ozguneş, Hemşaredarê Silopî Adalete Fîdan û Suleyman Şavluk zî tede xeylêk kesî tewrê aktîvîte bîyî.

Hemsereka HDPyî ya Cizîre Zîlane Ecevît aktîvîte de qisey kerd û vat: ''Merdimê ma verê çiman de ameyî qetilkerdene. Ma do ney xo vîr a nêkerê. Senî ke ê merdiman vatbi 'Ma do çok nêşorê erdî ro' ma zî do çok nêşorê erdî ro.''

Wekîl Ozguneşî zî îfade kerd ke ê do têkoşînê 177 kesan rê dewam bikerê.

Qiseykerdişan ra dima sînevîzyonêk ame mojnayene û mewlûd ame wendene.