Verê azadîya şarê Kurdan de astenganê tewr pîlan ra yew zî Kurdê ke dişmenan reyde xebetîyenê yê. Nê kesê winasîyê ke hende dişmenan zerar danê nê xoverdayîşê azadîye yo ke no 40 serre yo PKK dewam kena, bi desan gonîya şoreşgeranê bereyan rişnaya. Têgêrayîşê  PKK‘yî seba ke nê hemkarî weş analîz kerdê, xoverdayîşê xo yo tewr verên vera nê hêzan dayo. Xoverdayîşo ke vera nê hemkaran ameyo dayene Sêwrege û Curnê Reş (Hîlvan) de bîyo geş û derbê giranî dayê bi nê hêzan ro. Çarçiwaya nê xoverdayîşî de tarîxê 9-10 Êlule 1979 de, Dewa Axşunî de peynîya xoverdayîşo ke kewto tarîxî de mîlîtanê bereyî yê PKK'yî Cuma Tak reyde, mîlîtanê ke nameyê xo Alî Çat, Cuma Bozkoyun, Sadun Demîrkoç û Abdurrahman Manap o şehît kewenê. Mîlîtanê PKK yê ke di rojî xover danê, heta mermîya xo ya peyêne dayo pêra û teslîmbîyayîş red kerdo.

Bereyo Şoreşger Cuma Tak

Cuma Tako ke sey yew domanê keyeyekê xizanî 1956 de maya xo ra bîyo, seba ke keyeyê xo karkerîya mewsîmî kerda domanîya xo zor û zehmetîyan reyde vîyarta. Serranê xo yê qijan de seba ke keyeyê xo rê hetkarîye bikero Cuma Tak hamnanan xebitîyayo û zimistanan zî şîyo mekteb. Seba ke keyeyê xo haltenik bîyo mektebê mîyanênî de qeydê xo mektebê mamostayî yo bêpere yê Dêrsimî de keno. Serra 1975- 1976 de Apoparêzan şinasneno û bê ke didil bimano keweno mîyanê xoverdayîşî û beno mîlîtaneko aktîf.

Yew Kesayetîya xo ya Çêr û Çalake Esta

Cuma Tak Hêrema Dêrsimî de bi awayeko çalak xover dano û hamnanan ke êno Sêwrege nê xoverdayîşê xo dewam keno û vera neteweperestîya burjuvayanê kurdan xoverdayîşî dewam keno. Xora kesayetîya xo ya fedekar, qerardar, çalak û çêre, xoverdayîşê şoreşgerî de ê kena wayîrê yew îradeyê polatî û resnena yew awanîya bereyê şoreşgerî. Xoverdayîşê şoreşgerî de çi wezîfe ke gêno xo ser bê ke didil bimano ano ca. Wexto ke lazim bî Dêrsim de, Sêwrege, Riha û Curnê Reş (Hilvan) de waranê xoverdayîşî de ca girewt. Hîna ê serran de ameyêne zanayene ke o beno yew cengawerê şarî yo ke sekwanêdo baş o.

Beno sey Hedef

Cuma Tako ke vera hêzanê faşîst û kanperestan tewr vernî de şer keno, hêrema Riha de dewranê ke faşîstan hakîmîyetê xo nayo ro de zî warê xoverdayîşî terk nêkerdê, bi hîrê-çar embazanê xo ya şer kerdo û bi desan kadroyê faşîstî teberê safan de verdayê. Xoverdayîşê xo yê bidîsîplîn, qerardar û hişmendî û kesayetîya xo ya çêr û bêterse ra serkewte ters fîneno zerrîya faşîstan û beno sey hedef. Tarîxê 9‘ê Êlule 1979 de bi mîlîtananê PKK ke nameyê xo Cuma Bozkoyun, Alî Çat, Sadun Demîrkoç û Abdurrahman Manap o şonê dewa Sêwrege Axşun ke derbazê hêrema Bucaxan bibê. Ê wazenê ke şewe uca bimanê û roja bîne rayîr kewê. Eşîra Bucaxan pêhesîyena ke cengawerê PKK'yî dewa Axşun de yê û bi da heştaye çektaran qola Bucaxan dormeyê dewê gêna.

“Eke Şima Hende Êgît ê bêrê bi xo Teslîm Bigêrê”

Qola Bucaxana ke dormeyê dewe girewto venga mîlîtananê PKK dana ke teslîm bê. Cuma Tak cewab dano înan ke teslîmbîyayîş adetê partîzananê PKK'yî de çin o û vano “Eke şima hende êgît ê bêrê bi xo teslîm bigêrê.” Qola Bucaxan fehm kena ke mîlîtanê PKK'yî teslîm nêbenê û naye ser o galê dewe kenê. Dewa Axşunî de Mîlîtanê PKK'yî bi yew qehremanîya ke derbazê tarîxê qehremanîya kurdan bena, di rojî xo ver danê û musnenê ke teslîm nêbenê û mergê xo gênê xo çiman ver.

“Ma Bimirê zî Seba Xoserbîyayîşê Welatê Xo , Reyayîşê Şarê Xo Mirenê”

Pêrodayîş di rojî bêmabên dewam keno û Cuma Tak ge-ge xîtabê qola Bucaxan keno û vano. “Ez û embazê xo ma cengawerê PKK'yî yê. Ma vera axayanê sey Celal Cucaxî yo ke şima sey malzemê xebetneno û şarî rê zulim keno danîme pêro. Ma neferê yew pêrodayîşê heqdar û şandar îme. Ma bimirîme zî seba xoserbîyayîşê welatê xo, reyayîşê şarê xo mirenîme. Ma şima seba çinayî danê pêro? Ma bi şan û şerefê xo bê ke çimê ma peyde bimanê do bimirîme la şima heta kê nê rayîrê bêrumetî ser o bê herroj bi hezaran rey do bimirê.”

“Cebilxane Bidê Ma, Ma Reyna Şima de Şer Bikîrê.”

Pêrodayîşî de Alî Çat û Abdurrahman Manap şehît kewenê. Qola Bucaxan ra zî zaf pîyayî kişîyenê. Di rojan ra tepya cebilxanê Cuma Tak û embazanê ey qedîyeno û o taw Cuma Tak wina venga qole dano: “Mermîyê ma qedîyayî. Cebilxane biderê ma, ma reyna şima de şer bikîrê. Naye bizanerê ke ma eşkenme bêrîme kîştene la serekîya PKK û Şarê Kurdan do memiro. Alaya sûra ke ma heta peynîya emre xo bişeref kirişta rew-here do serbikewa. Biciwîyo Kurdîstano Demokratîk. Biciwîyo proleteryaya Kurdîstanî û serekîya berze yê şarê ma PKK.” Mîlîtanê PKK’yî ê ke mermîyê xo qedîyayê nêwazenê çekê înan bikewê destê dişmenan û çekanê xo erzenê adir veşnenê.

“Ma zî Zanê ke Şima Heqdar ê”

Pêrodayîşo ke di şoreşgerî tey şehîd kewenê ra pey qola Bucaxan Cuma Tak, Sadun Demirkoç û Cuma Bozkoyunî gêna bena dewa Çatokî. Cuma Tak tîya xîtabê qole keno. Qolê binê tesîrê helwestê ey ê qerardar û êgîtî û qiseykerdişê ey de manena û bi nê awayî cewab dana: “Ma zî zanê ke şima heqdar ê la ma se bikerê axayê ma va bikişerê.” Nê qiseykerdişî ra pey mîlîtananê PKK‘yî nanê qerşunan fek a û bi nê awayî kişenê û cenezayanê înan erzenê Royê Firatî.

Bi Yew Merasîmê Biîhtîşamî Yenê Rayîrkerdene

Rojan ra pey cenazayê mîlîtananê PKK‘yî Royê Firatî de yenê dozkerdene û Curnê Reş de yew merasîmê cenaza yo biîhtîşam yeno amedekerdene. Bi hezaran merdimî tewrê nê merasîmî benê û panc mîlîtanê PKK‘yî yê ke kolanê embazanê xo ser o seba raywanîya peyênê hîsîranê şarî reyde ênê rayîrkerdene xo dima yew mîrasê pîlî yê xoverdayîşî verdanê. Mîlîtananê PKK’yî  bi nê xoverdayîşî yo ke di rojî dewam kerdo musnayo ke bi şerefê xo merdişî tercîhê vileronayîşî û teslîmbîyayîşî kerdo û bi naye bîyê sembolê xoverdayîşî.